離開效力多年TVB　范振鋒疫情影響同李思欣造人大計

更新時間：01:26 2020-10-03 HKT
發佈時間：10:00 2020-10-03 HKT

范振鋒在訪問中大談離開效力多年TVB感受。

范振鋒（阿范）早前宣佈離開效力多年的TVB，日前他接受香港開電視主播馬梓軒專訪，分享離巢後心情，「我喺8月底離開，事前舊公司有同我傾續約，當時我問有冇咩工作可以延續落去，但佢哋都話暫時冇，所以決定離開。自己又冇唔開心嘅，因為我唔係全職淨係做一份工，所以唔會令我好擔心疫情下冇咗主要收入，又或者怕影響生計。」

雖然阿范身兼多職，有電台DJ、電影監製等工作，但疫情下，阿范坦言收入大減，「疫情開始至今，少咗7位數字收入！好彩我同老婆都係好慳嘅人，平時都係睇戲食飯，𠵱家旅行都去唔到，出街食飯亦少咗，所以我已經好識用網上外賣平台，好精明一睇就知邊間最抵食！不過都感恩電台、娛樂公司都可以繼續keep住有份人工畀到我。」

問到疫情下，會否影響與太太李思欣的造人大計，阿范笑言：「以前就覺得順其自然，𠵱家就冇咁自然，哈哈！因為除咗擔心疫情，個世界好似好恐怖同混亂！另外就係實際問題，原來疫情真係可以令人冇工開、零收入！自己可以慢慢捱，但如果生個小朋友，佢可能仲辛苦仲慘，所以都令我同太太有啲卻步！」