【擺明造票】花姐「被低胸」找數　阿Dee@ERROR迫姜濤放棄爭唱作人獎

更新時間：21:57 2021-03-15
發佈時間：19:00 2021-03-15

阿Dee憑《我們很帥》入圍《Chill Club推介榜年度推介20/21》「年度唱作人」。

ViuTV主辦的《Chill Club推介榜年度推介20/21》頒獎禮將於下月18日舉行，即日開始可一人一票投選。憑歌曲《我們很帥》入圍「年度唱作人」的ERROR成員阿Dee（何啟華），昨日即在社交網瘋狂「造票」，叫大家投他一票，等經理人花姐（黃慧君）着低胸裝找數！他還借早前散戶大軍挾爆沽空美國電子遊戲零售商GameStop（GME）一事，大搞爛Gag留言：「最近有『華爾街散戶夾爆沽空機構』，今日有『華啟何造票夾爆低胸花姐』！我知聽落去有啲不雅！但大家唔好錯重點！重點！就係今日（即昨日）！今日（即昨日）大家可以投票啦！佢地（哋）一人一股，SH to the moon！我地（哋）一人一票，SH to the 花！散戶大叫『GME』！造票大叫『低胸啲』！一齊實現香港人嘅核心價值『睇人 __ 街最開心』！為《我們很帥》創造奇蹟！」阿Dee仲抵死Hashtag「造票雖可恥但有用」，更稱「小弟已經準備咗一段speech」、「絕對懶係充滿啟發性充滿意義」。

花姐表示無奈。

同樣入圍年度唱作人的姜濤大方讓賽，更叫Fans轉投阿Dee。

不過阿Dee的拉票行為慘遭花姐潑冷水，她表示：「大家有眼嘅就唔好投阿Dee，黐線咩投阿Dee！阿Dee做唱作人？天有冇眼呀！」為證明花姐係眾望所歸，阿Dee請來一眾MIRROR成員在IG Story拍片幫手拉票，Alton（王智德）還爆笑撐兄弟：「何啟華全名係何啟才華，好有才華㗎佢，記住投畀佢！」同樣入圍「年度唱作人」的姜濤就大方讓賽，他說：「為咗花姐，我已經放棄咗呢個殊榮。因為我想投Dee哥一票，亦希望大家一齊投何啟華一票，因為我相信大家都想睇到花姐最美麗嘅一面，希望花姐嗰日係最美麗姿態。」語畢揸機的阿Dee再迫姜濤呼籲姜糖（姜濤粉絲稱呼）投他一票，姜濤即聽話說：「希望所有嘅姜糖都投何啟華先生一票，因為唱作人呢個獎項非佢莫屬！（阿Dee：你話你係自願嘅！）我係自願嘅！」場面爆笑！

Anson Lo誤以為阿Dee贏獎的話花姐要裸體，好好笑。

Stanley奸笑表示想睇花姐着泳衣。

至於Anson Lo（盧瀚霆，AL）亦呼籲一眾神徒（AL粉絲稱呼）投票畀阿Dee，但他竟傻更更反問到時是否有花姐的裸體睇，笑爆全場！而Stanley（邱士縉）聽來的版本又有啲唔同：「我想睇花姐着泳衣！係咪着泳衣㗎？我聽傳聞係咁講！」Jer（柳應廷）亦高呼阿Dee是「ViuTV一哥」，又笑說肯拉票全因對方會請食飯。此外，Edan、Ian及Frankie等MIRROR成員都有幫手拍片拉票。