囝囝性取向自由陳子豐最窮時兼職賣保險養家

更新時間：15:11 2021-08-27
發佈時間：15:15 2021-08-27

陳子豐最窮時要做兼職賣保險。

在港版《大叔的愛》飾演出櫃男Darren的陳子豐昨晚為黃婉曼（Icy)主持的購物平台做直播嘉賓，他在劇中為Anson Lo由直變攣，甘願犧牲妻兒去追尋真愛。現實生活中的子豐卻是盡責好老公及貓爸，經常在社交網晒家庭相，更暱稱兩歲囝囝做「老細」。

子豐有子萬事足，在太太產後便協助餵奶、換片和湊仔，父子關係親密，囝囝喜歡「親親爹哋」，陳太不但不呷醋，樂得擁有me time去煲劇。子豐不諱言太太是MIRROR忠粉，尤其追捧子豐劇中情敵Edan，子豐大爆老婆是「爵屎」：「佢甚至有自肥計劃，叫我邀請Edan同Anson佢哋返屋企聚會。」子豐與太太訂了規矩，家中若放了MIRROR成員海報或大相，必須有他同樣大細的相片放在旁邊，當然陳家只放一家三口靚相。

拍完《大叔的愛》，陳子豐人氣上升。

子豐目標是讓妻兒得到最好生活。

子豐因為《大》令知名度提升，搵錢機會大增，但回想未加入Viu TV時，工作量少收入不穩。「嗰時好窮，冇工開時我試過兼職賣保險，客人多數係身邊朋友同屋企人介紹，佢哋買晒就冇其他客，我怕醜唔夠主動去接觸陌生人，最終因為克服唔到，生意差，做咗一年就冇做。有一日着住老西嘅我經過海港城，望住鏡中自己倒影，我覺得唔自在，自己啱喺鏡頭下多啲，就結束保險生涯。」

子豐一家三口。

父子關係親密，囝囝喜歡「親親爹哋」。

子豐現在把握機會努力工作，目標是讓妻兒得到最好生活，但暫時未打算追女。Icy追問子豐有沒有想過若將來囝囝性向成疑的問題，他答：「有呀，我希望佢公開前畀啲hint，滲少少出嚟畀我知，唔好一嚟就帶個男朋友返嚟畀我surprise，我唔想變成晴天霹靂爸爸。我都好傳統吓，又係潮州人，得一個仔，好希望佢可以傳宗接代，而家就同囝囝多啲傾偈，建立朋友關係，怕佢反叛期時乜都唔同我講。」