感激好友相伴走出小產陰霾　林熹瞳：呢個人令我生活更完整

更新時間：22:31 2021-08-27 HKT
發佈時間：06:30 2021-08-28 HKT

Rachel撰長文感激好友Maggie相伴。

現年36歲的「怪談女」林熹瞳（Rachel）在今年4月表示懷孕八周，但檢查發現BB沒有心跳，惟有與老公何思哲與BB好好告別，並感激朋友和和網民的關心。雖然表面上Rachel似乎走出陰霾，收拾心情重新投入工作，但內心深處，這份傷痛實在需要一點時間去復原。日前Rachel在社交平台撰寫長文感謝一個人。本來這一篇很久以前已想發的文章，但她不想欺場，所以留待這一天，可以靜靜坐下來不慌不忙地去打這一篇文章：「如果我是男人，我一定會追她！呢個人令我生活更完整了；她不懂甜言蜜語，係一個不折不扣的行動派；她係非常好的聆聽者；自認識後，她幾乎參與了我人生所有大事，她已經融入我家中！」

Rachel當咗Maggie係屋企人。

今年4月，懷孕8周的Rachel發現BB冇心跳。

Rachel表示自從BB離開後，她封閉了自己，基本上除了老公外，任何人都不會見：「日日人唔似人、鬼唔似鬼！呢個人（Maggie）突然衝上嚟我屋企，我其實忍唔住反咗一個白眼，因為我狀態太差，太醜樣，滿心憤怒和哀痛，根本唔想見人。但冇諗過，我傾傾吓開始打開心扉，同佢傾咗8個小時，由張床傾到出沙發，無論我發怨氣，分析件事，定由盤古初開講起我的心路歷程，佢都照單全收，佢係好用心去聽，去感受我嘅感受。那天起，我終於肯落街，但一落街先發現原來身體真係差咗好多，行去超級市場買啲嘢，都要唞足一日。」

最後要接受流產。

她又稱當日收到通知要出席《逆天奇案》宣傳活動，當時內心實在很糾結，一方面非常想出席，但另一方面又擔心身體狀況：「我膽粗粗地打電話去問她，可否陪我去宣傳？她竟然話昨天已經攞咗大假，預咗陪我去，就算我唔俾，她都會跟著來！結果連綵排，一個半月內，前後分別陪我去咗7-8次左右，她每朝買定早餐上嚟我屋企接我出發，去到TVB只係當自己係助手，不停幫我拎嘢，照顧我飲水，幫我瞻前顧後，如果冇咗佢，我相信我真係做唔到。結果宣傳期完咗，我亦都康復了。」其後亦因為Rachel的一番話，Maggie陪她返教會：「我同佢講咗一句，『希望喺永生國度，會有你出現，如果見唔到你我會好唔開心！』之後佢就跟我返教會，每次都係由屯門去到香港仔華富邨，而家仲報咗洗禮班，差不多個個星期要去上堂。」