【簽亞視】出動梳化服搣走大媽look 薛影儀被改造成為「氣質女神」

即時娛樂

更新時間：14:59 2021-07-31 HKT
發佈時間：11:30 2021-07-31 HKT

亞視出動梳化服嚟打造阿儀。

37歲黃花閨女薛影儀雖然落選今年嘅《亞洲小姐競選2021》香港賽區，但網民唔使嗌失望住，因為阿儀挾住驚為天人嘅三點式泳衣Look，以「氣質佳麗」姿態殺入娛樂圈，率先簽約成為亞視藝人，昨天亞視仲出動梳、化、服嚟幫佢進行大改造，然後安排她去攝影房擺甫士影相。所見，阿儀只係化咗個濃妝，由內至外未見有大執。身穿啡色線衫襯白色闊身長褲及踼白膠拖嘅阿儀大媽味甚濃，仲因為「買錯胸圍戴錯bra」搞到上圍下垂。阿儀喺鏡頭前叉腰、托腮、轉身大擺甫士，影得相當投入，不過，木口木面，表現生硬。

亞視安排亞姐林寶玉衝入攝影房做直擊訪問。林寶玉忍住笑問阿儀，對於第一次改善形象冇乜感受？阿儀用慢三拍回應：「做得好好呀...件衫都靚呀！」她又話好習慣面對鏡嘅，可能自己夠大膽！所以唔驚囉！亦冇學過擺甫士。至於問到點解想做藝人？她又再眼仔碌碌，遲鈍答：「因為未試過呢啲經驗！」

而網民唔太like亞視改造阿儀，留言：「啲觀眾其實係想睇佢最真果面，點解要執走佢呢？」亦有好爆話：「點解唔幫佢預備個好啲嘅胸圍呢？有個好啲嘅胸圍承托，佢嘅身型(形)就會有改善，之後幫佢執下棚牙，再學習談吐技巧及訓練佢反應快少少，基本上都唔錯！」也有人睇唔過眼網民留言：「好心咪玩人地，真係慘！」當然有網民讚阿儀勇氣爆燈！