李國麟回應被封「最慘帶貨明星」：我係咪得罪咗人
發佈時間：18:00 2022-01-08
李國麟接受車淑梅電台節目《舊日的足跡》訪問，對被網民封為「最慘帶貨明星」，他聞言後笑稱：「好呀，我可以澄清一吓 ，其實我總共做咗四場直播，第一場7月尾喺杭州，營業額8萬多，流量59萬7千人次；第二場營業額38萬多，流量120萬人次，每次唔夠兩個鐘。」現被內地社交平台評為「劣質帶貨藝人」他直言牽涉團隊的售後服務未如理想，給粉絲的禮物遲遲未能送到，即使成功賣貨38萬結果退貨31萬。他直言非常失望，揚言不會再合作 。
後來，李國麟又參加了兩場直播帶貨，說：「嗰兩場同經理人公司做得好好多，做咗一次唔夠兩個鐘，一次四個鐘。可惜已被評為『劣質帶貨藝人』，營業額跌到7萬蚊，流量只得17萬幾。去年11月28日做最後一場，自己暫時停一停。」他稱會繼續登台、拍劇，因自己喜歡演戲多於帶貨做直播，帶貨只是想試試自己在陌生環境工作的能力。「我贏咗㗎喇，頭兩場佢哋都諗唔到有好成績！我贏咗㗎喇！好開心呀！」
李國麟續道：「突然睇到自己變成『最慘帶貨明星』，我就問搞乜鬼我係咪得罪咗人？」後來直播帶貨事件在內地反彈，一些貨主以為這是他的宣傳套路，反而有很多貨主要求合作。他的經理人公司辦公室本來已囤積了一些貨物，像一個小型超市，現在貨物多到變成了一個大型超市。他指事件令他經一事長一智，日後會小心選貨；更自言不會做8小時，因為體力根本不能應付。
對於會否怕這次事件影響形象？李國麟坦言：「我冇乜所謂。我入行46年，問題係點解會有咁樣嘅報道？我唔知點樣形容呢次事件，我冇嬲，只係好多同事關心我叫我小心啲，唔好咁辛苦！我屋企人都覺得好笑，因為我每次都同佢哋分享我嘅帶貨成績。」
李國麟表示現在最想返香港屋企，因為已在內地逗留了10個月。他現時與TVB的合約是每年拍一套劇，他想在自己仍然行得走得的時侯盡量去更大的市場發展，賺更多收入，令家人將來過得更舒服。「我好掛住屋企人，依家個女啱啱飛咗去英國讀Drama。仲記得2017年7月，我哋同一大班人慶祝佢15歲生日，嗰張嘴對嘴嘅相俾啲網民話我咁樣錫唔啱。其實當時只係開心分享，佢哋心態咁負能量，接受唔到唔緊要，我已經樂在其中，佢（女兒）係世界上最寶貴嘅嘢！」李國麟認為自己沒有做錯，即使他日自己年屆90歲仍會繼續錫50歲的女兒。至於女兒日後會否成為星二代？他指一切由女兒決定，他只希望女兒能開拓眼界，及學識做人。他自認非常寵愛女兒：「阿爸教落，唔知個女第二日嫁得好唔好，老竇錫咗佢先，如果萬一嫁得唔好，起碼都歎過吓父愛。」
立即下載 | 全新《星島頭條》APP : https://bit.ly/3yLrgYZ
