草蜢上《爆谷》晒30年前精壯肉照 蘇志威五官繃緊輪廓變晒現硬膠面
發佈時間：21:30 2022-09-19
上周六，ViuTV節目《爆谷一周》請嚟久別紅館5年，將於10月尾開4場Show的草蜢及其經理人林珊珊做嘉賓，現場觀眾全部都係跟咗草蜢多年的Fans，嘉賓講嘢又疊晒聲，加埋Fans起哄，所以全晚節目都非常之嘈。
TEXT:星島頭條娛樂組
請得草蜢當然就係聽佢哋話當年，例如分享當年粉絲追星的瘋狂行為，三人回憶出道不久，為方便工作夾份買咗一架車，有次完成工作後駕車離開被大批粉絲包圍，有瘋狂粉絲爬上車頂大叫「我愛你」。蔡一傑激動表示當時立即勸粉絲，「落返嚟先啦，有咩慢慢講。」三人後來發現車身因此而凹陷，車頭位置又被粉絲以鎖匙刮下兩個心心，草蜢表示當時噴油還原車身的價錢總數，等於幾個騷嘅酬勞，因此對粉絲又愛又恨，這些事亦是歌曲《又愛又恨》的來源。
訪問中又提到當年住九龍城的生活點滴，又指陳光榮是他們的業主，近年曾經問過蔡一智記唔記得當年講過一番話，就係「我哋係草蜢，呢類偶像組合，唔通唱到40歲咩?」觀眾即時起哄，已經57歲的蔡一智、56歲的蘇志威及55歲的蔡一傑都笑言真係唔好亂講嘢呀。而阿智再補充細個住屋邨，同阿傑及蘇志威都講過，到90歲都會拎住拐杖跳舞，歡呼聲響遍錄影廠。
另外，草蜢亦帶咗唔少珍藏上節目，包括陳年雜誌封面、人生第一張黑膠碟、人生第一個演唱會及寫真集，提到影雜誌封面，蔡一智兄弟最有感受，因為無論衣著定Pose都要自己搞掂，為咗有型，兩人會去深水埗買服裝配件，例如扣針，兩人成晚就係咁又手又釘務求將一件好普通的牛仔褸變得Fashion啲，兩人坦言「以為好易，凌晨加工搞足8個鐘。」
至於寫真集，蔡一智兄弟都睇得好開心，一邊揭一邊Show畀觀眾睇，特別係蔡一傑，因為相集中有大量佢嘅露肉照，當年靚仔又大隻，難怪咁自滿，不過蘇志威就唔係咁諗，由於佢本寫真集玩黑白相，邊睇邊話大吉利是，見佢一邊揭一邊笑，眼耳口鼻都幾繃緊，心水清觀眾應該發現蘇志威個樣有啲唔同咗，見佢大笑時塊面好似唔受控制，蘋果肌有啲硬硬哋，連登仔都疑惑，留言問蘇志威咪係整咗容?你哋覺得呢?
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
