獨家丨張頴康工餘拒接近女演員避爛桃花狂讚老婆麥雅緻令自己似返個人

更新時間：08:00 2023-05-12
發佈時間：08:00 2023-05-12

張頴康於劇集《法言人》中飾演戇直律師「大雄」，成功吸引「翁官」蔣祖曼主動追求成「翁雄」CP。而真實老婆麥雅緻（Angie）就於社交網公開放閃，直指當年鬼揞眼主動結識張頴康，對此，男方坦言會好珍惜老婆，更承諾會遠離桃花，杜絕任何可摧毀幸福家庭的機會。採訪：方騫平攝影：鄧國良服裝：@SPYHenryLau

張頴康首次挑戰飾演欠缺自信心的大律師，跟區院法官蔣祖曼相戀，他最初唔多認同劇中人物的故事設定，唔相信現實中會出現男尊女卑的狀況，他自爆試過食飯時同老婆的法律界朋友傾偈：「點知老婆就喺枱底係咁踼我提示收聲，原來呢對couple咁啱男係大狀女係法官，真係尷尬到飛起。」

後生一有錢就去飲酒
對於一家5口居住的大埔三層村屋曝光，可見客廳放到兩張沙發及按摩椅之餘仍空間十足，另將巨型花園變成「私家水上樂園」，阿康強調唔係豪宅只係村屋，而且郊區呎價唔高，但經已係夢想居所：「疫情下足不出戶，要畀到小朋友有足夠空間去玩，我哋兩公婆冇追求要住獨立屋，只求過簡單舒服生活。」當問到可有經濟壓力時？他大笑說：「我絕非賺到錢，都要太太出嚟做主持幫吓手，哈！要佢養我呀，我真係大仔，我哋一齊養3個，但Angie要養夠4個。」

講完笑，張頴康大讚老婆持家有道，財務全交太太處理：「以前訓練班時零積蓄，有錢就去飲酒好離譜，因為Angie，畀到溫暖屋企及正能量，我先似返個人，所以我好開心，唔會接觸女演員畀機會自己行差踏錯。」

《星島頭條》APP經已推出最新版本，請立即更新，瀏覽更精彩內容：http://www.stheadline.com/