獨家丨42歲龍婷認單身唔會揀圈中人拍拖 被評以鄧麗君腔走天下高EQ回應
發佈時間:07:00 2023-05-15
42歲有「小龍女」之稱的龍婷,成功由旺角行人專用區唱到《中年好聲音》,雖只能奪梗頸四,但獲得「觀眾最愛好聲音」獎,有觀眾緣更珍貴。龍婷坦認參賽只想提高知名度,所以今次絕對賺突。講到跟參賽者丁文俊傳緋聞,龍婷笑言只為收視率交戲,又首度公開感情狀況及擇偶條件。另外,她又承認正跟TVB傾合約,希望有機會唱劇集主題曲及拍劇。採訪:杜杜 攝影:Stanley
龍婷總結參加《中年》經歷,最初只為跳出旺角提高知名度,「諗住喺電視曝吓光,等睇TVB嘅朋友認識吓我,呢個節目好多人睇,佢哋見到呢個女仔熟口熟面,又知道我之前做過嘅嘢,我冇因為疫情冇表演放棄自己夢想。」
![未參加《中年》時,龍婷主力在街頭演出,旺角及中環碼頭均有其蹤影。](https://image.hkhl.hk/f/1024p0/0x0/100/none/96bcae89260e27387e34be439fb45a63/2023-05/81109146_605528700194415_6506478014346297344_n.jpg)
![以往龍婷除了街頭演出外,還有經營收費官網吸金。](https://image.hkhl.hk/f/1024p0/0x0/100/none/f0a40f39b5bc32bd4240a53ea29fae3c/2023-05/01_75.jpg)
![龍婷坦承以往粉絲多為「銀髮族」,所以IG粉絲人數只得700多。](https://image.hkhl.hk/f/1024p0/0x0/100/none/ed4d02db2fc4e5f4dff85a17fbc3fd92/2023-05/020_0.jpg)
得民心重要過攞三甲
賽前大熱的龍婷,最終三甲不入,不少觀眾戥她不值,「造馬」之聲不絕,當事人就認為絕無內定,更認為得民心更緊要,「自己盡咗力,唱完《瘋了》算係滿意表現,比賽梗有高有低,其實我有最受歡迎歌手獎好開心,得到民心係投票出嚟。」
![參賽後,龍婷早前到沙田街頭演出,粉絲人數遠勝從前。](https://image.hkhl.hk/f/1024p0/0x0/100/none/21e2eb4f61d77025d7ae2e216ee51059/2023-05/343762706_964394148336801_8470049918532228123_n.jpg)
向來擅唱鄧麗君及王菲歌曲的龍婷,對於被評「唱咩歌都係鄧麗君腔」,她就沒好氣道:「兩個都係天后有咩唔好呀!?鄧麗君你已經聽唔到,我把聲有少少似佢,有時唱返佢啲歌有咩唔好,我覺得好事嚟,話我似兩個不同時代最好嘅天后,我覺得係讚我。」講到唱任何歌都用同一唱腔,她就強調有以歌曲本身風格來演繹,「真係好搖滾咪好搖滾咁唱,做返嗰隻歌原本嘅情感。」
為收視交戲搞緋聞
講到參加《中年》得着多,龍婷就笑言不包括跟參賽者丁文俊傳緋聞,「大家熟咗一齊食吓飯傾吓偈,覺得佢個人都幾好,但比賽完咗個緋聞都完咗,以前為咗收視率呃你哋寫啲嘢!哈哈!配合吓囉!其實我哋冇嘢㗎!(交戲畀我哋?)我哋係藝人娛樂大家,你哋鍾意點樣娛樂,我哋咪配合返,完咗騷你哋都可以繼續寫緋聞,睇吓你哋搵唔搵到。」
![龍婷由街頭唱到上電視,一直得到一班龍粉落力支持。](https://image.hkhl.hk/f/1024p0/0x0/100/none/175e0aefe4dae9fb4c8b60b770ba01cd/2023-05/339998597_1251312929118896_2676790415269675093_n.jpg)
談到真實感情狀況,龍婷起初唔想講,「私人生活就簡簡單單冇乜嘢,做嘢嘅成就感較感情靠得住。」再追問就坦認單身,「𠵱家真係冇喎點樣認呀!我比較主觀啲,係好難搵。」講到理想型,她最初搞笑話:「我鍾意劉德華,四大天王都鍾意,最緊要佢叻過我,我可以依靠。」之後她才認真答:「唔會搵呢行嘅人,絕對唔會,唔會搵男歌手,因為我好了解自己情緒,自己都搞唔掂自己,唔想搵同行,做我哋呢行嘅人自信心要把握得好,但生活中唔可以太自我,要低調啲,呢樣嘢好似比較難把握囉!」她亦強調不需要靚仔同小鮮肉,「有才華緊要啲,畀我覺得佢係為我好、好錫我,年紀大啲經驗同能力會強啲,最起碼有問題時可以分享吓意見。」不過42歲的她未心急拍拖,「25歲後就心急嘅,𠵱家唔急啦!」
不談感情,只想努力工作的龍婷,正在跟TVB傾合約,對未來有很多目標想完成,「我喺屋企日日都睇TVB,好多籌款節目都想參與吓,幫啲需要嘅人,又希望有機會可以唱吓主題曲,知道好多人都想唱,所以要慢慢等囉!另外,演戲囉!如果覺得我可以栽培,我都願意吃苦。」
《星島頭條》新網站有更多精彩內容:http://www.stheadline.com/