張敬軒自爆以前成日「問價」開騷對晒肌有保留：喺唔影響市容情況下就試吓

更新時間：18:50 2023-05-20
發佈時間：18:50 2023-05-20

張敬軒今日（20日）以20週年大使身份到荃灣出席品牌活動，吸引超過300歌迷迫滿2層樓圍觀，張敬軒甫出場即惹來全場粉絲尖叫，場面非常墟冚。活動上，張敬軒與粉絲玩遊戲外，更向粉絲送擁抱，張敬軒指今次是演唱會閉關前最後一個大型活動，更透露會以最好狀態做演唱會，並會在個唱中唱新歌。

【相關閱讀】：張敬軒勁讚李司棋冇被時代淘汰有機會齊做網上節目唔一定靠電視台

【點擊睇張敬軒活動相】：

對於「賣大包」送抱，張敬軒笑言甚麼Size都想試，又大讚大家在「520」這日子的示愛方式很特別，剛才就看到一個粉絲拿着「我養你」的手幅，令他突然有「不想努力了」的感覺。張敬軒被問到曾否被人「問價」，他說：「冇，我問人多啲，以前做過agent，但自己就冇聽過，我唔喺射程範圍之內。」

張敬軒將於下月開騷，他指因疫情關係，近期推掉很多工作：「最近都爆爆哋，身邊都有同事中（染疫），要以身體（健康）為先，唯有食多啲保養品同休息多啲。」張敬軒指因最近有很多好看的演唱會，令他也有壓力，現時只能努力點及為個唱加入新元素及唱新歌換流程，由於不想個唱再出事，故雖然會多互動，但仍取消握手環節，而張敬軒亦不會收花收禮物：「冇辦法，因為而家除咗COVID仲有流感，我一定要保證演出嘅狀態，要對觀眾負責，呢個好緊要，自己都會打醒十二分精神，媽媽爸爸都已經搬嚟香港，啱啱好settle咗佢哋，都可以安心排練。」

至於嘉賓方面，張敬軒表示不想為請而請，所以仍未有決定，提到操肌，他笑言：「脹吓又縮吓，有時我跑步，同埋今次有少少舞蹈，我一出汗又細隻返，我喺Tyson嗰度操，我諗佢都好無奈……呢個仔好好，成日都叫我起身做運動，好似教練咁。」張敬軒又笑言因年齡問題，不會以Tyson為目標，至於會否騷肌？張敬軒說：「盡人事啦，喺唔影響市容情況下就試吓，以歌會友，呢啲留返俾後生。」

張敬軒又謂最近也有看到炒賣門票的問題，他也希望能想方法杜絕這種現象，暫時只能開放歌迷會、增加網站容量及增加工作人員處理，張敬軒表示：「去年四個人處理7000張飛，我哋賣飛都係網站去幫歌迷處理，但每次都要有一個分流嘅software，而家個software都冧冧哋，呢個真係要科技同埋錢，因為係按鐘計，希望下次可以再做好啲。」