獨家丨黎燕珊感動享受不用腦之旅仔女請東京旅行慶祝59歲生日

即時娛樂

更新時間：07:00 2023-05-29 HKT
發佈時間：07:00 2023-05-29 HKT

剛過去的5月20日是黎燕珊59歲生日，她開心登六前最後一個生日，獲大女詠詩（Wynce）和細仔德權邀請到東京旅行慶祝，同行還有未來女婿健仔。珊姐原來已跟仔女相隔15年再一家三口去旅行，現在仔女已識為她安排一切，興奮之餘亦很感動。採訪：杜杜

珊姐開心這個生日之旅完全不用費心，也感觸一對子女都長大了。

珊姐除了有旅行作為生日禮物，還收到鮮花。

珊姐跟詠詩和德權一齊欣賞東京夜景。

能夠跟一對仔女去玩，珊姐覺得特別值得紀念。

珊姐最初都擔心這個生日之旅未能成行，因她有劇在身怕難度期，「我客串緊《新聞女王》演何依婷媽咪，又準備開《逆天奇案2》，都擔心未必請到4日假，好彩最尾起行前公司都批咗，唔係就浪費晒啲仔女嘅心血。」珊姐笑言此行完全不用用腦，因一切仔女已為我安排好，令她玩得舒服又安心，「Wynce佢哋真係安排得好好，我哋去咗富士山附近玩，有得浸溫泉，又可以睇花田嗰啲靚風景，佢哋知我唔食牛肉同好多肉，都預備其他嘢畀我食，未來女婿健仔亦都好乖，提議自駕遊等我可以玩得舒服啲，所以呢4日我真係唔使點用腦，淨係食同玩咋！」

驚覺仔女已長大

回想上次一家三口之行，原來已是15年前，珊姐驚覺一對仔女已長大成人，「上次我一個帶佢哋兩個去玩，咩都要自己去搞真係好忙好攰，今次佢哋已經識得照顧返我轉頭，佢哋都大個晒。」原來囝囝將被派到英國工作，令珊姐特別感觸，「梗係唔捨得啦，雖然阿仔之前都去過外國讀書，都24歲咁大個，但係做媽咪都係會擔心嘅。」珊姐已計劃明年六十大壽可能會到英國一齊慶祝，「佢飛唔到返嚟，我咪去英國搵佢一齊玩囉，之後我有時間放假或者都會去英國住吓，但移民就唔會諗，我都係鍾意香港生活多啲，同埋我仲係好鍾意演戲。」