獨家丨葉巧琳享受同居生活唔急做人妻 EQ低易呷醋靠「綜藝魂」面對男友
發佈時間：07:00 2023-07-15
葉巧琳（Mischa）早前推出音樂企劃《The Odyssey of Freya》第3首作品《綜藝魂》，講人要經常戴着假面具做人好痛苦。MV中Mischa演人妻，明知老公出軌怕破壞關係而啞忍，她坦認以往跟男友相處亦不時戴着「綜藝魂」，因本身EQ極低易呷醋。講到現實幾時做人妻，Mischa好享受目前同居生活唔想變。採訪：杜杜 攝影：朱偉彥 髮型: Milk Chan@xenter化妝:cyrus lee 場地:Studio Meta
「綜藝魂」是台灣常用詞，形容藝人為節目效果要犧牲色相仍笑面迎人，簡單來講就是戴着假面具做人，Mischa坦言身為藝人難免有時都要有「綜藝魂」，不過連現實生活她間中都用到，「我同另一半可能嗌咗交，但要見啲friend食飯，其實大家都仲未平復到，不過喺班friend面前都要扮晒冇嘢，呢個係禮貌，唔想將家事帶去騷擾到人，呢啲都係『綜藝魂』。」
貓奴生活當做媽咪
MV中Mischa飾演人妻，明知老公出軌怕破壞關係唔敢出聲，她笑言自己好彩現實未遇過，但跟現任男友拍拖13年，初期都試過戴住面具相處，「初頭幾年都真係『綜藝魂』上身，我哋各自各出去蒲時，我的確好多時會呷醋，好易嬲，EQ真係好低，發脾氣又喊，但仲要扮大方，回想返都真係幾傻豬，但時間耐咗信任多咗就放心好多，𠵱家佢同邊個出去我都係一百個放心，我知大家幾愛對方，就自自然然做返自己，𠵱家相處就冇晒『綜藝魂』。」
不過跟男友同居6年，38歲的Mischa就不心急做人妻，「一齊住咪差唔多嘅嘢。」她亦沒有憧憬的婚禮，跟男友都好怕大排筵席，「我哋兩個都唔鍾意呢樣嘢，我諗第時結婚簽個字就算㗎啦！」講到生BB，Mischa也怕怕，「我覺得責任太大，我保障唔到佢第時大個生活係點樣，同埋自私啲講句，我都唔想冇咗自己嘅生活，我有兩隻貓貓，有好多嘢已經係圍繞住佢哋轉，佢哋10歲，我都算做咗10年媽咪，佢哋𠵱家年紀比較大，有好多身體嘅狀況出現，我都唔可以去旅行，一定要留喺屋企照顧佢哋，我個男人係比較唔細心，所以好多嘢我都係親力親為。」
《星島頭條》新網站有更多精彩內容：http://www.stheadline.com/
