星8卦｜「家姐」屢受情傷心急嫁人擲重金玩相睇

更新時間：11:00 2023-07-28
發佈時間：11:00 2023-07-28

女人一到咗咁上下年紀，難免係鍾意求其搵個男人嫁一嫁，總係覺得就算離婚都叫嫁過，做咗人生一件事無遺憾！「家姐」情路可謂坎坷，一直都遇人不淑。同「青梅」搞足十幾年，日日俾人催結婚，結果有苦自己，對方嗰位勢利阿媽一直阻頭阻勢，喺出面就話想阿仔快啲結婚，其實背後搞好多小動作拆散，嫌「家姐」出身唔夠好。

之後同「整容」一齊，雖然細自己好多，但可以重拾初戀嘅感覺，不惜打埋本畀佢做生意，營運唔錯㗎，可惜俾佢知道對方兩岸三地各有女友一個，自己唔係香港區唯一代表，傷心到就嚟要自殺。

去到一個年紀，你揀人人揀你啦，朋友就介紹佢去私人婚姻介紹所玩配對，成件事唔使廿幾萬，但無話包生仔，不過搵畀佢相睇嘅對象都好高質素，又夠保密唔會周圍講。最好係相睇地點係外地，所以呢排佢一個月飛幾次就係享受呢啲服務。「家姐」亦講到明唔要「整容」嘅同鄉，而且要三十幾歲嘅小鮮肉，仲要揀靚仔。大家都笑佢死性不改，貪嫩口到頭嚟又係傷到自己，何況呢個歲數嘅男人又使乜相睇呀，希望「家姐」快啲有着落啦！