獨家丨19歲林智樂開到口想攞新人獎等足3年先出派台歌好難受

更新時間：07:00 2023-08-02
發佈時間：07:00 2023-08-02

林智樂（Felix）2021年參加《聲夢傳奇》入行，等足3年終推出新歌《忘記趁早》，他坦認等待日子好難頂，而要A0的他唱情歌，只能借別人的經歷來演繹。未來他希望推出自家創作，更想衝擊新人獎。採訪：杜杜髮型:Anthony Wong 化妝: Kyo Lee

Felix想新歌以四季或人生做主題，被笑老積似憑《中年好聲音》出道。

《忘記》MV在港拍攝， Felix希望下次可到日韓取景。

Felix新歌《忘記趁早》講年輕人感情唔成熟，經常會扮灑脫想同前度鬥快忘記對方。不過未有拍拖經驗的他，全靠朋友幫手才能投入感情演繹，「我問朋友有冇發生過呢啲故仔，好彩都有喎！就攞咗佢哋咁刻骨銘心嘅經歷嚟投入囉！」而他最開心邀請Christopher Chak寫歌成功，「由細到大都好鍾意佢嘅作品，《富士山下》、《搜神記》及《鍾無艷》等好多hit歌，作為歌手點都要搵佢寫一首歌，但冇諗過咁快搵到大師級幫我寫歌。」

A0的Felix要投入感情唱歌及演戲，全靠借人經歷加幻想。

入行3年，19歲的Felix好滿意目前發展。

自己寫歌向唱作人發展

出道3年才推出首支派台歌，Felix坦認等待過程絕不好受，「難頂㗎！我有催係咪可以快啲出，好驚今年都出唔到，自己都有調節心情，就算懷疑又點，都改變唔到，唯有唔好諗咁多。」去年收到可以出歌消息正值拍攝劇集《回歸》，他笑言本想尖叫但要忍住，「都要扮冷靜㗎！記得我收到demo時，聽咗半首歌，就俾人叫埋位。」

較同是《聲夢》出身的冼靖峰和孫漢霖遲出歌，Felix曾經心灰。

Felix主持音樂節目《Music Break》，有機會開Live跟樂迷互動。

Felix想嘗試輕快或R&B曲風，更已開始寫歌，希望未來能推出自家作品，「都寫咗兩首，一首同Aska（張馳豪）一齊寫，但未有適合時機出，覺得好好聽。」他雖然滿意目前發展，但承認好貪心，想有更多機會，「好嘢冇人會嫌多，所以想今年出多一、兩首歌，應該都有機會。」而每個歌手只有一次競逐新人獎機會，Felix都好恨擁有，「梗係想攞到啦，又冇話攞唔到會好失望，不過一定會盡全力去做。」