獨家丨COLLAR自爆拍綜藝最大死穴 DAY最大膽Candy越拍越勇Sumling見公敵即嘔
發佈時間：07:00 2023-08-10
自So Ching於5月宣佈離團後，COLLAR重新出發，除推出最新團歌《idc》、到日本拍攝MV及第二個綜藝節目《全日制COLLAR學院》外，更另設網上綜藝節目《COLLAR COLLECTS》在自家YouTube頻道播出。對於拍綜藝，7人都有唔同嘅死穴，難得自爆完仲識講笑，覺得公司製作部會好快搵佢哋挑戰底線，原來COLLAR都幾幽默。採訪：杜杜 攝影：Stanley 形象:Daniel Cheung、Chesney Lau 髮型:Taurus Lee、Kristy Cheng 化妝:San Chan、Kineks ho、Cathy Zhang、Jenny Fung、Percy Shing、Janice Wong 服裝:Dickies&Farfetch、Puyi Optical、Dr Martens 場地:香港康得思酒店
7個女仔首次出trip都覺得好難忘，Sumling形容：「好似男女朋友第一次去外地旅行咁。」出發前經理人都擔心她們會嗌交，Gao說：「同我哋講agenda，劈頭第一句就係相親相愛唔好嗌交，哈哈！」Sumling補充，「我哋都相處咗好耐，知道大家性格，會識得點樣去遷就，仲越嚟越愛，我成日幻想自己係男生，愛你哋每個人嘅唔同地方。」
Marf原來係團媽
由於Winka好奇一問：「咁你愛我啲咩？」變成Sumling的表白時間，「我愛你嘅溫柔同sexy，（Winka：我溫柔咩？）你嗰啲嗲囉！好鍾意同Candy玩，好正，佢不拘小節，唔會好小劇場，又好顧人感受；Ivy直情係視覺享受啦！幾時望都咁靚，已經滿足咗，同埋佢好識食，成日帶我食好嘢；愛Marf有種好老婆嘅感覺，佢成日提我『唔好咁樣翹腳，唔好咁樣坐啦』，好照顧你嘅人生。」Winka都加把口讚Marf，「好似今日件衫，造型師已經幫我釘實咗，但係佢都話『唔得，你知你㗎啦，一笑大動作就會走光』。」被笑有媽媽feel，難得Marf都認同，「我同Sumling講『每樣嘢冇話最好，但你都唔會聽』，哈哈！」
Sumling眼中的Gao是賢妻良母，「所有嘢都幫你打點好晒，仲好識幫你慳錢，我買任何嘢都會問佢意見，叫得我買都係適合買，叫我唔好買都係幫我慳錢，『呢個你有兩件啦』，冇咗佢搞唔掂；Day就係可愛無敵，行埋嚟話『我想食呢個』，你已經好開心想餵埋佢食，哈哈！佢係好貼心嘅人，同佢相處完全冇壓力，所以如果我係男仔，會要晒佢哋。」
底線可以踩出嚟
連拍兩個綜藝節目，成員都大呼好玩，講到玩遊戲底線，7人都各有死穴。Gao講明最驚蟲，「所有昆蟲類，特別唔知咩嚟嗰啲。」Day最關心有冇得沖涼，「最怕整污糟咗冇得沖涼，有就OK！」Marf以為自己冇底線，但睇過ERROR的綜藝節目後，就覺得未必頂得住，「蟲我都OK，但唔係佢哋咁玩。（曱甴爬身得唔得？）我需要着好緊身嘅衫，好多呢啲條件，我諗都真係唔得囉，哈哈！但係你逼我，我又唔會唔做，逼到盡頭我係OK。」此時Ivy「突破盲腸」，「個底線係踩出嚟嘅！」全場爆笑。而Ivy就抗拒玩恐怖嘢，「我未見過鬼又唔係特別信，但一個人去好黑、荒廢地方，好驚就唔得！我之前玩主題樂園鬼屋，會掹住隔離嘅人同埋全程合埋眼，但係有COLLAR一齊可以試吓，起碼我踎咗喺度都有人幫我嗌救命。」
Sumling致命傷係曱甴，「曱甴係有種令人好不安、恐懼、發惡夢嘅感覺，望住佢多3秒都想嘔。」Winka同樣怕蟲，聽見大家討論已經話頭痛，「我唔怕肢體碰撞，可以玩得好癲，但接受唔到蟲，會尖叫海豚音畀你聽，聽到爆耳膜，蟲真係唔玩得，真係會發脾氣囉！有少少距離OK，如果要掂或者爬喺我度真係唔得。」對於底線可以踩出嚟，Candy絕對認同，「我嘅底線一次比一次低，本身好細膽，喺韓國好驚玩過山車，仲要360度轉，最後又玩咗。今次都有樣挑戰，一直冇幻想過會接觸，全世界最驚嘅一樣嘢，但我去咗接觸，未出街賣個關子先。為節目好睇，會願意嘗試，除非有生命危險。」
《星島頭條》新網站有更多精彩內容：http://www.stheadline.com/
