名人雜誌丨193企硬:唔會做倒模式藝人 大爆因「前度」改變人生 再見難做朋友

ERROR成員郭嘉駿（193）向來瓣數多多，近來除拍完綜藝節目《ERROR暑假自作業》、電影《陰目偵信》亦已上映，接下來中秋節又會搞個人品牌的生意，10月底更將首次演出舞台劇《Laugh Vacation》，工作可謂排到密麻麻。本月中，193終推出今年首支派台歌《以為只是沒送花》，早前他接受本報獨家訪問，大談工作近況、戀愛史、擇偶條件，及為「謝票風波」作回應，當中更提到與花姐相處間的小秘密。

193早前接受本報訪問，談到新歌內容，提及花店及咖啡，並將自己與前度的真實經歷也寫入歌曲中，他表示：「其實呢個女仔影響我幾深，例如佢嗰陣想收花覺得好靚，但我覺得幾百蚊擺一個星期好嘥錢，所以咁耐我只係送過一次花，做呢首歌嘅時候，我都諗返起呢啲畫面。」他笑言現在的他寧願送「包包」，反而覺得比較實際 。

原來193去年開cafe都是受前度影響，「以前一直都唔飲咖啡，覺得又酸又苦，有個女朋友卻特別鍾意去Cafe打卡，自己亦慢慢鍾意了咖啡這種味道，最後開埋咖啡店。」193表示與前度再見不是朋友，很少聯絡，一來怕尷尬，二來免得影響對方發展另一段感情。

擇偶:順眼鄰家女孩就得

現年33歲的193大談擇偶條件，「我會prefer細水長流兼平平淡淡嘅愛情。當然我知道大部分後生女都唔係，所以要啲老女人，已經經歷晒所有嘢，唔需要再有浪漫嘢。」未幾，搞笑的193又立即轉呔表示大年紀唔得，理想對象要細10年的女性：「如果我搵同年紀嘅女仔，佢會進入逼婚階段，所以如果搵細10年嘅女仔，佢30歲，我40歲就啱啱好啦，但始終件紀細的話，彼此經歷好唔同，思想就難夾啲。」他更覺得潛意識覺得一定要同高妹拍拖，襯返自己，但從來冇試過。

問到介唔介意女仔整容？193搞笑表示：「整容的話，拍散拖都得，如果要過人世，就要諗好長遠，可能第二時生個小朋友出嚟好醜，同個樣完全唔一樣咪大鑊。微調都接受到，整容就麻麻哋，我冇特別標準嘅靚，順眼鄰家女孩就得。」

性格:唔想變成一式一樣

193一向出名敢言，有網民認為193態度過分「寸嘴」，直腸直肚作風經常成為網民箭靶，但他坦言性格衝動是真正的自己：「以前好care，直情有諗過開啲Account扮fans回覆自己，我明白有正評一定有負評，唯有盡量避免睇。我怕我為咗人哋改變自己性格，變成一式一樣嘅藝人。啲人鍾意193咩嘢？唔通鍾意我唱歌跳舞咩，鍾意193就係因為佢嘅個性，所以我唔想改變我自己，但有時衝口而出最衰就係令自己後悔，改變唔到事實，我會記一世。」

193又重提近日新片《陰目偵信》的「謝票風波」，早前他在社交群表示，因謝票收到騷擾信息，自言不會出席謝票活動，因而牽起風波，他表示：「呢件事上面我絕對有錯嘅地方，因為我太多工作，導致我有啲謝票場冇去到，過咗一日收到花姐電話，佢一句都冇鬧我，仲媽媽式關心我『我唔可以每次都幫到你，你要自己照顧自己啦』近年花姐忙咗好多，就算佢唔得閒都會搵其他人照顧我哋。」

投資:唔蝕錢已心足

193去年與友人開咖啡店，問到他的投資心得，他大方透露：「咖啡店真係冇賺錢，你諗吓做幾耐先回到百幾萬裝修費，所以純粹係一個情懷、為興趣。做到中段直情要蝕錢，之後同咗一個飲食集團合作，食物質素及宣傳做得好咗，開始賺返錢，我嘅願望係一直run落去，唔好蝕錢已經心滿意足，唯一有可能會執笠，係我嘅partner覺得賺得唔夠多，始終人哋都係商業營運，要花心機經營，但賺得不多。」他又透露自己是愛車之人，亦會投資在車上：「有架車，我喺日本買返嚟40萬元，而家升到60萬，我冇乜娛樂，返工放工之外，揸車就係我唯一娛樂，車，令我有me time，但都開始準備想投資工廈或者一啲單位，而家樓價開始跌，都想買層樓俾父母。」

寵粉:唔想流失一個

向來寵粉的193去年曾揚言要做好每一件事，望能讓「老婆」們能自豪地說：「我是193的粉絲。」對於粉絲多年來的支持，他表示：「我覺得我啲fans係比較乖，只要我肯同佢哋溝通或者叫佢哋唔好咁做，佢哋都幾聽話，但「咩人跟咩人」有時佢哋見到Haters留言，有啲真係會鬧人，我有時唔小心睇到都會覺得，嘩！點解把口同我一樣，真係咩人鐘意咩人！我相信有唔少人因為我嘅言論離開，但如果係咁我唔care，咁即係代表佢本身唔了解我嘅性格，所以佢走咗都唔係我嘅損失，亦都唔係佢嘅損失，只不過係佢之前未了解清楚就鍾意一樣嘢。如果鍾意我嘅人係知道我係咩料先，我都有留意有啲fans以前有開193 IG，我都有察覺有人少咗出post，不過每個人每個階段鍾意嘅嘢都唔同，可能佢識咗新男朋友，而佢男朋友又唔鍾意193，好多唔同嘅原因，但我始終唔想流失任何一個。有時我會當咗佢哋係朋友，會同佢哋傾吓偈，睇住佢哋成長，有時佢哋考試都會同我講；仲有啲人帶埋仔女嚟，我聽以前啲明星講，fans嘅年紀係隨着佢嘅年齡增長，佢20歲鍾意我，20年後佢40歲帶埋自己仔女去睇佢演唱會，呢個交流係好得意，互相見證大家成長好特別。」

他非常感恩謂：「我以為冇人會無緣無故咁愛一個人，但係原來真係有，所以好慶幸有佢哋。」

193表示第一首有錢搵填詞人寫的歌曲，便是寫給「老婆」們；而「老婆」們搞的一切應援及包場活動都會盡量去，「有一日ERROR拍完MV真係好攰，揸車都瞓着咁滯，但都堅持去佢哋包場，因為知道佢哋真係衷心支持我，我會盡量滿足佢哋。」

撰文 : 娛樂組 攝影 : 譚志光、Nicky Jai 場地 ： Tanuki Coffee

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ