獨家丨唐詩詠自揭人生錯晒：細個只關心有冇錢 孟加拉探訪童婚女孩反思扭曲童年
發佈時間：07:00 2023-10-11
愛貓剛離世的唐詩詠早前獲國際培幼會（香港）邀請，到孟加拉首都達卡及偏遠的古里格拉姆縣，探訪一班受童婚影響的女孩及家庭。此行令她有好大得著，覺得香港人應該去當地感受下，又令她反思童年因父母離異令思想變得扭曲，價值觀錯晒，以為有錢就可以令家庭變回完整，一早放棄讀書，所以她希望透過自身經歷，向小朋友分享不要鑽牛角尖。採訪：杜杜 攝影：譚志光
詩詠好早已想參與慈善探訪，但以往在TVB工作太困身，根本不可能，「有邀請過，但一路拍劇冇機會。」而今次探訪主題跟她2020年製作的動畫短片《唐詩詠的私密故事—最後的那一瞬間》很相似，令她更想參與，「又係講小女孩，好想去做，再諗以後就唔會再做。」
被黃翠如老點狂帶廁紙
今次孟加拉之行，打了3支防疫針的詩詠，有向曾到訪當地的旅遊達人閨密黃翠如攞貼士，「佢建議帶廁紙，所以我真係帶咗好多，去到發現人哋啲廁紙都好好，但我都多謝佢，哈哈！」另外，居住環境亦令她改觀，「雖然住民宿，但唔係好落後，有熱水沖涼已經好好，我試過拍劇冇熱水沖涼，橫店嗰時未發展，最慘大家一齊收工，我好後先沖就冇晒熱水要等嘞，去到一開就有熱水就冇問題啦！」
探訪時的女孩表現，更令詩詠思考很多，「我喺佢哋10幾歲年紀，都唔知自己想做咩，但佢哋已經想做醫生、法官、軍人、警察，有個想做科學家研發癌症藥物，每個嘅願景去到好遠，同埋佢哋都好大愛，想做嘅職業都係想幫人，知道知識可以改變命運，個個都好想讀書。」詩詠認為她們面對逆境的積極樂觀，香港人都應去感受一下，「有小朋友一定要帶佢哋去睇，感受吓自己有幾幸福，佢哋生活環境係差到好難改變，但佢哋仍擁有希望，內心好強大，身邊啲人少少事就唔開心，不如你望吓人哋先啦！」
想挑戰綜藝以前唔敢試
童年詩詠沒有大夢想，只關心有冇錢，「小學時覺得收銀日日收咁多錢，大個咗又覺得做會計幾好，嗰時經歷咗金融風暴，發現錢好重要。」她重視錢也跟父母分開有關，「呢個位有啲扭曲，我同媽咪出街會專登唔食嘢，佢就會畀100蚊我，要我食咗碗飯，細個唔識，我以為要錢，但其實係要佢嘅關注，但就變咗覺得搵錢好重要，覺得係咪金融風暴令到屋企咁。」因此她拍了第1個廣告後，便決定放棄學業，「覺得有咗錢屋企就會好啲，所有嘢變返以前咁完整，我好快放棄咗讀書。」
詩詠承認當年因沒人提醒她，所以現在好想將自己親身經歷跟小朋友分享，「細個屋企有好多變化，冇家長話畀我聽，好真實發生緊咩事，所有嘢都係我去諗去估計，去完呢個旅程，發覺佢哋家庭好團結，互相支持同包容，同我𠵱家想做嘅project一樣，小朋友可能細個時遇到困難，我哋盡快去幫佢諗通，唔好入咗個牛角尖。」她想將這個想法放在未來的創作上，「之前做咗個動畫片，想將佢變成好多唔同嘅嘢，可以出書，或者發展成舞台劇、短片，希望有更加多可能。」
離開TVB剛好1年，詩詠好享受現在有更多me time的生活模式，除了食中藥調理身體，還上堂學了很多東西。而完成這次探訪後，她希望未來能做更多慈善工作，她開心粉絲很知道她心意，「以前搞聖誕聚會，但𠵱家我哋會做義工、探訪老人家，好開心我冇特別要求，咁啱大家會有呢個諗法，我想繼續開呢度門，將我嘅睇法傳播出去。」至於演藝工作，詩詠坦認以往角色大同小異，離開後出現轉變，「搵我做嘅角色好唔同，好想畀多啲人睇，我自己都唔知嘅嘢。」她更想挑戰拍綜藝，「以前我好怕，因為冇劇本，我不嬲跟住劇本走，呢個moment都想試吓。」
《星島頭條》新網站有更多精彩內容：http://www.stheadline.com/
