獨家丨方力申激甜愛的宣言:希望女友因為我變得開心 首演舞台劇大壓力綵排忍唔住喊
發佈時間：07:00 2023-10-31
入行22年的方力申首次挑戰舞台劇，跟資深戲劇工作者張可堅演出《相約星期二》，劇本講述學生每周上門陪伴患「漸凍人症」的教授，在臨終前14個星期，聆聽他的最後教誨。小方坦言有很多得著，思考生命意義之餘，明白有個共到患難嘅伴侶非常重要，更對有經歷嘅女友葉萱（Maple）許下承諾：「希望做到正能量男友，女友有我會好開心。」採訪：方騫平 攝影：譚志光 化妝：Yen Lai 髮型：Kin Tam@ ILCoplo 服裝：Mark Fast
《相約星期二》將於11月3日至12日於香港演藝學院公演12場，故事改編自真人真事，提醒大家要珍惜和思考生命意義。當中金句「學習付出愛，接納愛，是人生最寶貴的一課。」及「明白死亡，你就學懂活著。」張可堅讚賞小方，即使做咗男一多年都能保持誠懇及謙卑態度，對此，小方帶點尷尬：「我覺得面係人哋畀，假係自己丟！做乜崗位都好，謙卑係好重要，尤其做藝人只係娛樂大家，甚麼都不是，冇fans唔會受歡迎，有幾多個藝人係不能取代呀？」他承認演舞台劇不為酬勞，只為跳出舒適圈，視為學習機會，讓觀眾睇到他進步：「今次唔難唔做，因為個劇只得兩位演員，每人要記成個鐘台詞，不論綵排及圍讀都俾老師整喊我，希望用真情能感動到觀眾，最怕現場喊到失聲講唔到對白，甚至會發台瘟，keep唔住狀態，我幫親友買咗700張門票，女友都會捧場，多少都有壓力。」
每次拍拖都諗結婚
對於劇中有段師生對白提到，「身邊冇另一半，有事時會點呀？」小方亦十分認同：「年紀慢慢增長，係需要搵到個能共患難嘅伴侶去相依為命，結婚生仔係應該要有嘅。」當記者追問他係咪已遇到真命女友Maple？他大笑說：「我好似挖個陷阱畀自己踩，講完都知自己瀨嘢，只能答順其自然啦，其實每段感情我都朝住結婚方向，因為我做人好認真，但𠵱家滿腦子都係台詞，所以答唔到你。」他認為結婚好講timing：「我好希望只結一次婚，故雙方要好了解，唔止係我要諗，對方都要諗得好清楚，要確認對方，因為我同佢都會變老，一段關係唔能夠只係睇外表及激情，要睇兩人相處及價值觀，唔係結咗就完，反而只係新開始。」
享受拍拖互相𠱁吓
小方指世上沒有不勞而獲的東西，目前他努力經營跟Maple的關係：「藝人有咁多緋聞，唔易畀到安全感人哋，所以最重要大家相處，我哋咪該拍拖時拍拖；你𠱁吓我；我𠱁吓你；互相發吓對方脾氣咁，做啲拍拖嘅嘢。」提到Maple捲入邪教風波要上庭指證，作為暖男男友的小方揚言會盡力陪伴：「每人面對生活都會有唔開心嘅時候，永遠都係正能量唔夠負能量大，我個人都幾正能量㗎，希望女友有我會變得開心，成為佢嘅正能量男友！但實際係點就要問返佢，由我問佢，可能係個好客氣答案。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
