獨家丨梁雍婷盼電影引起社會關注 簡君晋拍《白日之下》鼓勵受傷靈魂
發佈時間：07:00 2023-11-02 HKT
由簡君晋執導、梁雍婷（Rachel）主演的電影《白日之下》，改編自殘疾院舍內虐待院友的真人真事，獲金馬獎5項提名。因為受當年報導觸動，簡導將故事拍成電影，希望給切身經歷的人起鼓勵作用。而獲提名金馬獎最佳女配角的Rachel，就認為演得再好，也無法還原受害者痛苦，最想電影能引起社會關注所有院舍的欺凌事件。採訪：杜杜 攝影：Stanley髮型:Oscar Ngan(Rachel)化妝:Deep Choi(Rachel)服裝:alice+olivia、Charles & Keith(Rachel)場地:1881 Heritage
簡導早在2015、16年看到有關殘疾院舍及安老院的新聞報導，感受好深，後來跟相關記者傾偈，決定將故事搬上大銀幕，「唔係想重現個事實，係作為人點樣去睇呢件事？人與人之間嘅情同埋人性，對我嚟講係最緊要。」因為曾經被這類人民關懷議題電影，如《星光伴我心》鼓勵過，「當自己有幸拍到電影，都希望拍到咁樣嘅戲。」電影舉行優先場後，他收到不少新聞工作者、社工及曾切身感受的人跟他道謝，「好似拍一拍佢哋膊頭，對佢哋有少少鼓勵，我係開心嘅。」
同影壇icon合作好感動
電影大部份角色，簡導都以試鏡方式選角，除了獲提名金馬獎最佳男配角的林保怡等資深演員，而搵保怡演「章院長」是導演黃綺琳和陳健朗提議，「佢哋合作過，知道保怡係好鍾意挑戰自己嘅演員，我喺岑珈其婚禮叫阿朗介紹認識。」而胡楓（修哥）和姜大衛（John哥）參演，簡導好興奮，「記得第一日見到修哥同John哥喺我面前出現，一個係60年代歌舞片嘅icon，一個係70年代嘅『姜B』，武俠片嘅icon，係佢哋闖咗個電影圈返嚟，我哋先可以繼續拍，嗰吓有啲感動。」
Rachel當年睇有關新聞時已好憤怒，一直烙印在心，到演繹智障人士「小鈴」令她有更深體會，「演員做得幾好，都冇辦法還原受害者痛苦，呢樣令我感受最深。希望多啲觀眾入場，因為電影最好就係可以改變社會，或者影響人思想，呢套係提出問題嘅電影，答案就留返畀觀眾消化。」對於獲提名金馬獎最佳女配角，Rachel認為全靠好團隊，「當然好感恩，今年係金馬六十年咁歷史性時刻，冇話覺得自己好勁，繼續學習，演員係好長嘅路。」
《星島頭條》新網站有更多精彩內容：http://www.stheadline.com/
