獨家丨胡慧冲經茶餐廳成功送禮畀發哥自己嚇自己冇中降只係病菌入腸

更新時間：07:00 2023-11-30
發佈時間：07:00 2023-11-30

由「泰國通」胡慧冲（Roger）主持的J2王牌節目《冲遊泰國》播出第9輯，知名度大增的他日前快閃返港，並以香港情懷為題，走訪九龍城一間地道茶餐廳、中古店及位於山腰的自助式茶樓拍片，推動香港經濟，Roger最開心透過茶餐廳老闆幫忙，成功將收藏的貼紙交到熟客周潤發手上。採訪：方騫平

胡慧冲從泰國帶發哥貼紙返港，往九龍城一間茶餐廳尋找周潤發蹤跡。

因為撞唔到偶像，只能交託店員幫忙交收。

柯打了發哥必吃的香蔥豬扒公仔麵。

Roger去咗九龍城一間茶餐廳追蹤周潤發。

《冲遊9》由胡慧冲率「冬蔭家族」成員包括大肚冬蔭妹、哥哥woody、表妹、「叉燒姐」鄺玲玲及新成員表姐Yen上陣，最後3集蘇梅島旅程，更有樂翊榆著泳裝做秘密武器。今集受歡迎的鄺玲玲除以學生妹造型登場，上演制服誘惑外，更微露事業線派福利，她更向Roger承諾下輯會更性感，「派糖」畀觀眾。

發哥回應收到晒
Roger日前返港探親兼拍片，除咗去中古店，用$188買咗本絕版「微黃」刊物，感受一吓當年契公點解會偷睇得咁開心，又去咗九龍城一間發哥最愛嘅茶餐廳，連同多年前在泰國中古店購得的發哥經典劇照貼紙一併打卡，還柯打了發哥必吃的香蔥豬扒公仔麵：「發哥咁有型，又靚仔，風流倜儻邊個唔鍾意佢呀！當年我都係《上海灘》、《網中人》fans。」最後他交託餐廳老闆轉交貼紙畀發哥，據知轉交行動大成功，發哥已取走貼紙並回應識得Roger。

發哥係胡慧冲偶像。

返港在中古店打卡。

胡慧冲自言也想巧遇曾志偉：「我想佢宣傳多啲《冲遊》系列，《冲遊》能夠做到今時今日，多謝TVB畀機會，冬蔭妹由少女升呢人母，我就多咗好多觀眾認識，由『二打六』變『三打七』，希望能長做長有。」另外， Roger在FB上載一臉病容相片，並稱疑似因「衰多口」被落降，及後他向本報解釋並冇中降，只係涉及一啲是非令他諗多咗，經醫生診斷是感冒菌入腸，打針及食藥後病情已改善。