獨家丨朱智賢「封胸」展開人生另一頁 TVB黃金十年學會精叻做人
發佈時間：07:00 2023-12-05 HKT
37歲的朱智賢於今年9月15日約滿離巢TVB，結束長達10年嘅賓主關係。朱朱於10年前參選港姐入行，之後經歷做過娛樂新聞台主播、主持，再到拍劇，為TVB獻上黃金十年，然而十年間嘅高低起跌，教她多思考，精啲做人，亦帶給她有危機意識，警覺到喺觀眾睇嫌自己身材前，要見好就收，展開人生另一頁。採訪：方騫平 攝影：朱偉彥 場地：Variety Music Academy
《企業強人》後係朱智賢告別TVB劇作，她坦言TVB對她好好，甚至出動包薪挽留，但唔想再留喺溫室被動工作，𠵱家她大個女「大學」畢業了，野心大咗，好想轉個環境，靠自己努力搵多啲，因為家有患上心臟病嘅老犬，恆常醫藥費開支好大，故有財政壓力：「回復自由身兩個多月後，收入係比以前好嘅，男友謝東閔知我搞得掂，唔使經濟支援。」
往事只能回味
朱智賢曾被封《3日2夜》女神，32C激凸上圍更成為熱話，朱智賢自言要退位：「其實年紀問題係主要因素，TVB每年有咁多後生仔女，我年紀唔細喇，係時候慢慢轉型，唔可以成日仲着泳裝去拍旅遊節目《3日2夜》，唔通拍到50歲咩？早幾年公司畀工作就做，一直冇思考過前路，直至某日突然間醒覺，計計吓唔對路喎！過多兩年就算自己想拍，人哋都未必想睇，唔好嚇人喇，見好就收，我唔想被人批評，記憶永遠是最美好的，哈！往事只能回味。」她認為自己身材高高瘦瘦勝在夠平均，卻非「澎湃」嗰種，加上着嘅三點式唔係特別少布，所以初期拍《3日2夜》時一直冇人留意，其後突然喺年30晚播出嘅台灣篇爆紅，她都意想不到。
問到在TVB十年嘅啟發？朱朱承認呢十年喺人和事上都有好多開心及不開心經歷：「我個性格比較簡單直接，而且轉數慢唔係好聰明，𠵱家學會慢慢思考，精啲做人，好彩唔開心時會做運動及睇書，個人就會開心好多。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
