獨家丨盧覓雪呻同AL少交流Ben Sir讚好Edan 首演夫妻超夾求拍床上用品廣告
發佈時間：06:00 2023-12-08 HKT
盧覓雪（Michelle）和Ben Sir（歐陽偉豪）在ViuTV劇《社內相親》首合作演女主角陳漢娜父母，因為一拍即合，希望繼續拍住搵真銀，更即場度廣告Idea，又海狗丸又口服液相當搞笑。至於跟MIRROR成員Anson Lo（盧瀚霆）和Edan（呂爵安）合作，Ben Sir向「神徒」晒命，笑指親手感受過AL的結實肌肉；又讚Edan是吹水高手，對老人家仲好好𠻹。採訪：杜杜 攝影：Stanley
Michelle奇怪一埋位已跟Ben Sir有老夫老妻感覺，「我哋雖然識，但真係唔熟，完全冇私交，我連佢電話都冇。」Ben Sir最希望劇中一家能帶到歡樂畀觀眾，「成個社會都苦瓜乾咁，除《愛回家》外，多一個選擇，哈哈！」Michelle提「老公」要趁機招商，Ben Sir即話：「最緊要有廣告先支持到我哋個笑容，雪雪and Ben Ben，可以賣床上用品，仲要互送禮物，佢贈啲海狗丸或者前列腺丸畀我，我就贈返佢媽咪口服液、靜心丸咁。」Michelle提議一家人可賣家庭保險廣告，「𠵱家好興，仲有啲年金，自願醫保，哈哈！」Ben Sir笑得勁開心。
Edan好照顧家英哥
講到跟Anson Lo和Edan合作，他們完全感受到兩人粉絲的應援威力。Michelle曾於2019年跟Edan合作處境劇《娛樂風雲》，她讚他成熟不少，「我哋本身有一齊玩，合作起嚟會更容易。」另外Michelle歎私下未有太多機會接觸AL，「佢工作態度好好係預期之內，但唔知佢個人係點，因拍攝地方細，搬機位要返各自休息室，冇乜機會交流。」Ben Sir眼中AL比較cool，「我同佢交流嘅戲得一、兩場，但試過完咗拍佢膊頭，好實嘅，係堅嘅，哈哈！」至於Edan感覺比較親和，「我哋傾到偈，佢又叫我教吓佢英文，大家又傾吓大學選修科，佢話揀嗰科因為易啲，佢吹水能力係高嘅，同埋好照顧老人家，對家英哥照顧周到。」
《星島頭條》新網站有更多精彩內容：http://www.stheadline.com/
