獨家丨李尚正保障癌末女友加大意外保額 主持《臥底》系列搵命搏成堆恐怖經歷
發佈時間：07:00 2023-12-23
42歲李尚正夥拍盧頌恩（妹頭）拍攝的HOYTV皇牌節目《臥底》系列不時中伏，唔少任務亦搵命搏，熱播中的《臥底旅行團3.0》，兩人的歐洲之旅反跟蹤扒手黨；又在惠州揚帆出海時發生意外，妹頭被帆船桅杆擊中頭部，嚇到阿正面都青，好驚失去一個好拍檔！阿正坦言為照顧患末期癌病的女友，要好好保住條命仔，更為自己份意外保險加大了4倍，等女友有更大保障。採訪：方騫平
李尚正在港大修讀建築，除係「有線一哥」，仲因為拍住林海峰主持節目《有線娛樂乜人台》獲周星馳賞識，成為星爺御用演出班底，演過《美人魚》、《西遊.降魔篇》、《長江七號》等，他和妹頭主持《臥底》系列多年好受歡迎，兩人慶幸喺節目中報道中伏位，出街後冇受過驚嚇，反而有被邀再隨團深入了解。
妹頭被桅杆擊中頭
提到《臥底旅行團3.0》難忘片段，妹頭首推惠州之旅嘅風帆體驗，她猶有餘悸：「當帆船駛到深海時風雲變色，個天突然好黑，帆船被風吹到左搖右擺，桅杆擊中我個頭，我驚到嗱嗱聲要求回岸，但船家及導遊不顧安危，聚埋一邊開心『打卡』，搞到隻船側埋一邊。」阿正認為係一件危險事，其實要認真對待：「接待觀光客嘅內地人冇乜安全意識，落船前只係提供一件救生衣，唔會有安全指引，而且船夫好chill咁將帆船越開越遠，然後着未經訓練嘅團友拉帆，同船嘅老人家完全唔識死。」阿正又重提年前嘅清遠行，喺冇人流管制下，跟大批遊客行上玻璃橋，妹頭望住橋下一步一驚心：「唉！咁搵食係咁㗎啦，冇出事唯有盡力做。」
深入危險區域食蠔
阿正為挑戰《臥底》系列，私下買嘅意外保險每年要萬多元：「以前劉明軒都試過拍節目時玩滑水梯，尾龍骨受傷行唔到，因為我係合約藝員，有時真係冇得推。」妹頭都佩服阿正勇氣：「3·11日本大地震後年多，阿正幫我『頂』，途經福島縣取景拍《舞吧！韓日住囉囉》，以身試險狂食廣島蠔。」阿正笑說：「如果公司有『二哥』我一定叫佢去！」妹頭大讚他好man，只能說能力越大責任越大。
女友曾休克幾分鐘
另外，阿正和女友拍拖18年，而女友患腦癌16年，現已擴散至淋巴、胃部、腎臟，最麻煩經常受感染變關節炎，有時免疫力會自己打自己。阿正坦言會共度患難，好好照顧對方身心：「佢每次更新遺祝；甚至瞓唔到都會係壓力，我唯有提佢放輕鬆，更加唔敢突然提出結婚，費事佢亂諗嘢，因為病人嘅心理狀態好唔同，如果我辭職睇住佢，佢會更加難過。」阿正盡量用樂觀態度面對逆境：「佢係末期癌症病人，醫生都畀定心理準備，知道佢個病隨時有變化，就好似公司時不時『大地震』咁，經歷過幾次就會習慣，最危險一次，試過休克咗幾分鐘，當時得我一個人喺屋企真係驚到癲，唯有係咁喚醒佢及檢查佢心跳，好彩大步欖過，所以屋企長備強心針。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
