獨家丨杜以辰譚永浩唔介意困身冇得旅行演200場長壽劇《青春日誌》唔覺悶

更新時間：07:00 2024-01-06
發佈時間：07:00 2024-01-06

2019年，杜以辰（前名杜小喬）和譚永浩因合演香港首個長壽音樂劇《我們的青春日誌》拍拖，兩人由音樂劇初哥，到現在演出超過200場，幾年來跟角色一同成長，令他們感受特別深。做長壽劇看似困身兼悶，他們唔認同反覺得每日都有新鮮感，更希望長演長有。採訪：杜杜

以辰和永浩寓工作於拍拖，感情有增無減。

以辰由當年的音樂劇初哥，到現在已立志做個好的音樂劇演員。

永浩當日上台仍未夠信心演出，現在已懂得享受舞台。

以辰和永浩當年首次參與《青春日誌》時，坦認表現完全未達標。以辰說：「嗰時真係好青澀，咩技巧都冇，只係靠內在感受去演，好彩我哋演情侶。」永浩亦好認同，「以前我哋演出，自己就算好感動，觀眾可能唔知我哋做緊乜，哈哈！但係𠵱家好唔同，知點用聲線、身體去表達，令觀眾感受呢啲情感。」

2019年，剛拍拖的以辰和永浩為《青春日誌》綵排。

兩人戲裹戲外都是情侶，演起來特別易投入。

靠眼神已經解決問題

兩人除得到製作人陳恩碩（Tom）不斷提點外，亦有進修演戲、跳舞、唱歌，甚至學埋配音。現在以辰挑戰一日兩場演出，飾演兩個不同角色，「有時日場就做萬人迷『Nancy』，夜場就演返乖學生『Jessica』，Tom真係好睇得起我，仲會喺場口之間即刻畀提示我跟住做，但係對角色了解多咗，同角色一齊成長，𠵱家演得好舒服。」永浩就認為這就是長壽劇好玩之處，「我哋唔單止同角色成長，同台前幕後都一齊成長，呢種感覺好正。」

以辰一直演乖乖女Jessica外，最近還挑戰女神「Nancy」。

永浩演繹充滿夢想又頑皮的「Victor」。

他們跟角色和幕後建立了很好的連繫，認為長期演出有安全感多於悶，以辰說：「有次我哋拎漏道具上台，雖然唔講得嘢，大家一個眼神，其他演員就知道出咗事，一齊諗方法執生，呢種默契真係唔易做到。」對於演長壽劇好難請假去旅行，兩人完全不介意，只希望長演長有。永浩說：「喺香港有長壽音樂劇係Tom嘅夢想，一艘咁大嘅船入面，我可以參與其中，透過我演嘅角色傳達呢個訊息，佢覺得我幫到手，好樂意繼續做落去。」