獨家丨黃庭鋒戒甜兩周刻苦操出靚腹肌 視梁朝偉為目標盼40歲前穩坐男一
發佈時間：08:00 2024-01-12 HKT
黃庭鋒在《妳不是她》飾演健身教練「Man」，有騷肌演出令他好大壓力，開拍前只得兩星期準備，唯有靠戒食狂操。《OPM》後，庭鋒未有機會再做男一，35歲的他坦認有點心急，但明白自己仍有好多不足，期望40歲前能穩坐男一位置，視陳豪和梁朝偉為目標。採訪：杜杜 攝影：羅安強 服裝:Harrison Wong場地:Velo Italian Bar & Grill
庭鋒接到「Man」這個角色時，最大壓力竟然是在身材上，「監製話畀我聽要除衫，平時都有keep吓都唔太擔心，但後尾知道係演PT教練，就諗大件事嘞，畀幾多時間我操先，得兩星期，點變到似健身教練嘅身形呢？！唯有即刻戒食甜嘢同碳水化合物，跟住狂操囉！好彩𠵱家通常見到嘅腹肌都已經有90分，所以我將重點放喺嗰幾格朱古力度，希望出嚟大家收貨啦！」
雙線發展做全能藝人
繼去年myTV Super上架的《OPM》做過男一後，庭鋒暫時未有再做主角機會，他承認有點心急，始終35歲的他起步較遲，但也明白急不來，「步伐都真係想快啲，但老實講仲有好多嘢要學同改善，之前做過一次男一，好彩有蔣老師（蔣志光）教我，嗰次經驗幫到我。」他希望40歲前能穩坐男一位置，仲有幾年時間畀自己好好表現，「對自己有信心或者認同自己，都要決定嘅人去認同你，仲要啲時間或者多啲作品，自己當然希望可以快啲做到。」
講到目標，電視圈方面庭鋒首選陳豪，「首先我鍾意佢個人，家庭、演戲又好，我哋都有少少緣份，佢啲小朋友喺我以前教體育嗰間學校讀書，有次學校活動見到面，之後我哋多咗話題，佢又好照顧我。」至於終極目標是梁朝偉，「絕對係好榜樣，佢好似好淡然，但係咩角色都扮到，工作嘅專業，真係要望住佢去做。」另外，他絕不放棄主持工作，「希望做個全能藝人，所以想雙線發展，況且做主持都熟練咗，冇演戲咁大壓力。」
《星島頭條》新網站有更多精彩內容：http://www.stheadline.com/
