獨家丨鄭中基難再請囡囡上台：佢青春期呀首做演唱會主辦呻紅館規例成日改

更新時間：07:00 2024-01-24
發佈時間：07:00 2024-01-24

鄭中基（Ronald）將於農曆年舉行《Fragments of Wonder演唱會》（香港站），剛宣佈加開終極第6場。由於今次巡唱身兼5職，更首次出資任主辦單位，他坦認邊學邊做壓力好大，又要控制Budget，特別是紅館因MIRROR演唱會意外而不斷修改規例，但他享受壓力下工作。另外，香港站會再次邀請12歲大女Emma上台，強調囡囡踏入青春期，應該冇下次，所以份外珍惜。採訪：杜杜攝影：Stanley 形象:@_3ddy 髮型:Horace Tse@horacetse化妝:Henry Li@henryli_makeup場地:香港康得思酒店@cordishk

Ronald坦認自己做老闆，在製作上有鬆手地方，主要在舞台和音響方面。

今次個唱主題講適應，Ronald從近年港人移民外地後得到啟發，「我都有朋友移民，仲要帶住細路，好辛苦！又要搵新工作，又要搵學校，但同佢哋傾偈或者睇佢哋社交平台，都係講啲開心嘢，搵到已經遺忘咗好耐嘅開心，如喺外國飲到杯凍奶茶。」他認為經歷疫情後，大家可能已經遺忘了開心，想透過演唱會傳送正能量，「3個鐘入面暫時忘記唔開心嘅嘢，幾唔開心都好，都要搵時間𠱁自己開心。」

Ronald的太太余思敏和一對子女現身澳門站。

Ronald早前為巡唱舉行記者會。

唱歌28年上台仍緊張

Ronald在巡唱身兼5職，包括：主辦、監製、投資、宣傳及主唱，多個崗位都未做過，特別是首次做主辦單位，就算早前舉行了澳門站，但幫助不大，「澳門場地細啲同紅館分別好大，rundown又係短版本，好多新嘢再接觸，當係熱身，今次打大佬嘞！」他又坦認做主辦單位最困難是控制預算，「開始梗係諗得好好，做主辦鍾意點都得，好似影poster又倒模又特技化妝，澳門埋班都OK，到香港就慘嘞，要控制返啲，做完終於明白，主辦點解成日話要控制Budget。」由於前年MIRROR演唱會意外，導致舞台規例不斷修改，也令他很頭痛，「最擔心就係紅館個規例成日改，其實係不停改緊，對上個禮拜又改咗，所以我哋個台嘅設計又要改嘞！」

《Fragments of Wonder演唱會》去年底已舉行澳門站。

Ronald為影海報的特技化妝，事前要做倒模。

講到尋找快樂及減壓方法，Ronald除了食，快樂泉源就是來自家庭，「我覺得工作一定要有壓力，先會做得好，我次次開演唱會，或者唱咗咁多年歌，出場都驚、會緊張，心跳好快，我問過（張）學友會唔會？佢話『我有喎』，佢唱咗咁耐歌都有，係咪唔正常呢！？緊張先可以畀壓力自己做得好啲，係要同佢共存，點樣去適應？好消極會覺得壓力好大，積極就係要利用呢個壓力，用壓力畀返壓力嗰個壓力。」

Ronald認為減壓最佳方法就是食，以及跟家人一齊。

Ronald跟演唱經驗更豐富的學友一樣，上台仍會好緊張。

歌迷投訴唱太多慘歌

繼2019年演唱會後，Ronald再邀請長女Emma上台，「係我問佢嘅，今次又係新年喎！又去紅館喎！你想唔想唱？佢話『好呀』。」他笑言8歲細仔Evan演出機會比較微，「佢鍾意走嚟走去，完全冇上台嘅意慾。」他又認為Emma雖然鍾意唱歌，但12歲的她開始踏入青春期，同台機會買少見少，所以特別珍惜這次機會，「第時可能又係新年，佢話『唔好啦，我又約咗啲friend，老竇，我會嚟最尾嗰場囉』哈哈！」他認為下次開騷都未必可以請到囡囡同台，「我相信好快，𠵱家都開始有少少反叛，又識貪靚呀！」

2019年Ronald在《One More Time》演唱會，首邀Emma同台。

2021年Ronald舉行《Drive In》演唱會，父親鄭東漢亦有捧場。

今次巡唱海報相當特別，Ronald身上黐滿多個小模型，象徵他入行28年的每個歷程，若然要多加個模型，代表現階段對音樂事業的追求？他即想到要加個錄音室的panel，因他未試過為自己整張唱片做監製，「幾隻歌就試過，嗰時覺得歌手永遠好主觀，去揀歌或者自己做隻碟，未必啱公司要求，所以唔會堅持自己做晒，所以想試成隻碟。」他認為自己做監製，可以多控制歌曲的主題，全部歌都是自己鍾意才製作，「以前唱片公司話慘歌好賣啲，所以有咁慘得咁慘，想做返啲開心歌，唔使咁慘啦！」加上他幾年前收到歌迷反映，嫌他太多慘情歌，希望做監製可製作更多開心歌，「歌迷話『可唔可以唱啲開心嘅歌，次次失戀唱你啲歌，想熱戀時唱』係喎！又講得幾啱喎！」