獨家丨胡蓓蔚唱歌被豹哥鬧到懷疑人生 結婚16年相處靠互踩保鮮
發佈時間：08:00 2024-01-26
演戲唔多嘅胡蓓蔚（豹嫂）在新劇《旁觀者》中飾演王敏奕媽媽，真摰母女情好有發揮，拍到慘情場口時會爆喊。但豹嫂卻未獲老公單立文(豹哥)讚賞，更常被撥冷水：「佢會彈我『睇吓你幾多演戲痕跡！』其實佢演戲都有改善空間啫。」最慘唱歌都被老公鬧走音，難得豹嫂越鬧越唱，原來兩公婆的保鮮方式係互踩，好搞笑。採訪：方騫平 攝影：譚志光
胡蓓蔚在劇中有老中青階段，年輕時沉迷戀愛，同時有9個男友，由於漠視女兒王敏奕，王敏奕對她又愛又恨，最終愛得太遲。豹嫂稱雖然戲份唔多，但過足戲癮，更碌人情卡搵袁偉豪客串做其中一位男朋友，揸電單車接她去拍拖。
叫王敏奕做老師
豹嫂私下會稱呼王敏奕做老師，提點她聲線、節奏、走位等：「我哋由互不相識到產生莫名其妙的火花，仲做埋好朋友，拍到傷心位時唔可以互望，因為一望就忍唔住爆喊，有場戲佢鏡頭內外都喊到暈，真係一位好勁嘅演員，仲會成日鼓勵我。」相反老公常撥她冷水：「尤其玩音樂，佢有一個嚴格標準及要求，會好惡踩到我無地自容，如我喺屋企練歌時，佢會大聲痛斥錯處『走音』、『低咗(音)』、『(音)唔準』、『尾音震』、『冇氣』…即使我唱歌出身都會令我懷疑人生，究竟係咪唔識唱歌？試過驚到要趁佢唔喺屋企先敢練歌，𠵱家佢越鬧越唱，要佢鬧到唔好意思，收聲話『好啲』！可能我平時成日管住佢飲食，哦佢食得唔健康，所以有機會就入我。」
豹嫂還會動腦筋「食住」豹哥：「佢朝早6點起身開工呻慘，埋怨我瞓到隻豬咁，我就答佢，冇計啦我嫁得好，佢唯有陪笑，再答唔出話來，哈！」兩公婆拍拖11年、結婚16年仍sweet到爆，更無悔唔生B：「自己決定冇得後悔。」
《區區有申訴》答問題送盆菜，現正進行利是公價問卷調查，編輯部會揀選最具創意的得奬者，送出價值$1698「新春佛跳牆盆菜」套餐或價值$198「五福臨門煲」︰ https://bit.ly/3Ucj7tg
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
