獨家丨陳國坤拍《反黑2》狠心粉碎囝囝演員夢 讚肥仔聰兒子好打得可拍《少年足球》
發佈時間：07:00 2024-01-31
2017年，陳國坤（小龍）和導演宋本中製作網劇《反黑》口碑極佳，更成為首部登錄Netflix的粵語劇。相隔6年，終於開拍《反黑2》，小龍及宋導表示疫情影響外，因劇本包含1830年到1997年的香港歷史，資料搜集極花時間，提到已故的吳孟達更相當懷念。而曾客串《反黑》的小龍囝囝陳真，《反黑2》就冇佢份，原因係身兼主演及監製的老竇覺得佢冇天份，更大爆肥仔聰的囝囝又Cute又好打，可以開套《少年足球》畀佢拍。採訪：杜杜 攝影：Stanley
講到製作費達2億元，更傳有意邀請奧斯卡影帝羅拔迪尼路及安東尼鶴健士演出，宋導就澄清，「唔係我哋官方講，製作費亦有限，用晒成部戲嘅預算都唔夠請，我當然想啦！我都打過畀佢，不過話唔得閒，哈哈！一個係佐敦版，一個係旺角版，都唔得閒。」不過小龍承認有意邀請外國演員演出，「講核心嘅黑勢力嚟自外國，好想搵啲有份量嘅外國演員，大家都認識嘅。」
李璨琛冇份拍《反黑2》
小龍及宋導都希望原班人馬演出《反黑2》，但上輯有份投資及演出的李璨琛，今次不會參與，宋導解釋是「商業決定。」而他們覺得最遺憾是已離世的前輩黃樹棠和吳孟達，提到達哥更特別感觸，宋導表示《反黑》時，達哥已關心籌備劇本的進度，小龍又大讚達哥提點對他們幫助極大，「佢一句話就打通我哋任督二脈。」小龍又想到拍第1輯時對方的專業態度，「我哋定裝、試衫嗰日，佢已經搞好晒同佢角色有關連嘅嘢，同導演亦交代晒。」宋導再補充，「嗰日仲要係佢生日，我好感動。」宋導最難忘寫《反黑2》劇本時，達哥已病重入院，「有段時間我都好混亂，點樣將歷史同劇結合呢？！到吳孟達先生出事，我哋去見佢最後一面，佢仲畀到能量我，覺得一定要寫好個劇本，嗰吓火就上嚟，我真係好掛住佢！」
小龍感謝達哥的安撫
小龍相信觀眾都會掛住達哥，所以劇集會有致敬部份，但不會太刻意。小龍透露對達哥感情特別深，因入行拍《少林足球》第1個鏡頭就得到前輩照顧，令他永世難忘，「第1次同佢拍就拍咗37個take，就係我講『鋒哥，邊個唔識鋒哥呀』嗰個，我第1個鏡頭拍咗9千尺菲林，周生（星爺）當時已經好嬲，達哥慢慢安撫，仲同我講咗好多嘢，有句好深刻，佢話『有幾多演員第1次拍戲就可以對住周星馳、吳孟達，畀咁多菲林去訓練你，呢啲真係天賜嘅機會』嗰句令我充滿力量。」小龍話當時根本唔識得怯，因連自己做緊乜都未知，「第1次拍戲，朝早6點就畀張寫滿字嘅紙你背，5分鐘後就拍，記得已經好勁。達哥拍拍我膊頭，就係畀到一個定海神針。」
肥仔聰囝囝好有潛質
《反黑2》大部分在香港拍攝，小龍最開心，因為收工可以返屋企而非酒店。提到7歲囝囝陳真可以經常去探班，他就好無奈：「佢大個唔會掛住我，掛住去玩啦！我係佢伴讀書僮嚟。」《反黑》時小龍太太黃伊汶和陳真都有份演出，但後者不會再參與《反黑2》。宋導都讚陳真靚仔，好有明星風範，但小龍認為囝囝非演戲材料，「之前喺青島拍戲，佢放暑假嚟探班，佢問『可唔可以試吓做演員』，嗰套戲我有個女同佢差唔多大，我話『你睇我哋拍先』，有場戲講我個女喺我面前喊，我話『做演員就咁，凌晨兩點陳真你喊畀我睇』佢話喊唔到，我話『你冇得做演員嘞，哈哈，演員要隨時控制你情緒』。」
小龍一直有教陳真打功夫，但後者不及同樣跟他習武的林子聰兒子林奕滔有表演天份，「佢同肥仔聰個仔係兩師兄弟，肥仔聰個仔勁佢好多，武癡嚟，5歲打雙節棍打到好似我咁，絕對有潛質，同埋佢真心鍾意，成日上台表演，真係有表演慾，同埋佢係cute嘅肥仔，迷你洪金寶咁，又可以打側手翻。」宋導即度到，「整個《少年足球》。」小龍再笑言：「硬憾《少林女足》，哈哈！講啫做唔到。」小龍又謂只要星爺開聲，隨時準備拍《少林女足》，「佢叫到唔收錢都做，佢係神級人物，好多年冇見，但有聯絡，其實我哋好怕見到佢，好似見訓導主任咁，好有壓力，自己狀況差啲都唔好見到佢。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
