葉振棠有慰問李龍基：唔敢畀意見自嘲80歲頭腦簡單讚「嫩妻」畫逼真丨獨家

更新時間：07:00 2024-02-08
發佈時間：07:00 2024-02-08

上個月的娛樂版好精彩，李龍基「嫩妻」王青霞（Chris）的黑材料揭極都有，圈中人都被捲入，皆因「嫩妻」有鋪送畫癮，曾高調送出超過50幅畫風及質素不一的「自家畫作」，受惠的包括視帝、視后及政壇人物，連基哥老拍檔葉振棠都「有幸」收到，對於「大師」的畫作，棠哥讚畫得好逼真，再問到基哥事件，他坦言有「食吓花生」，又希望老拍檔可以好好解決。採訪：方騫平

80歲葉振棠不問世事，最緊要身體健康。

棠哥為環星娛樂年初一播出嘅網上節目獻唱。

葉振棠、Joe Junior無意退休。

葉振棠、Joe Junior惺惺相惜。

全城關注73歲李龍基跟年輕36歲未婚妻王青霞的「爺孫戀」風波，後者的黑材料日日新鮮，花生指數極高，繼被指借3萬美金走數後，學歷亦疑似造假，連畫作都係淘寶貨，甚至被踢爆冒認繆騫人女兒，又傳她18年跟基哥一齊時已跟美軍結婚，頭頂滲綠色的基哥懶理Chris有成噸黑材料依然力撐：「過去嘅由得佢過去，佢話以後會乖乖哋。」

覺得畫作好逼真

前年5月，葉振棠、李龍基、陳浩德合體做《三生有幸經典演唱會》，Chris曾送上人像油畫，祝賀3人演出成功。油畫以演唱會海報中3人的照片作藍本，畫功逼真，Chris揚言用咗10幾日時間親手繪畫；到了去年7月，熱愛畫畫的Chris再出手，同樣送人像油畫賀老公及葉振棠做《雙生双識演唱會》。曾收過Chirs畫作的棠哥透露油畫仍放在家中，問到覺得幅畫靚唔靚，Chirs係咪好有藝術細胞時？棠哥一臉尷尬笑說：「我唔識呀，我個人頭腦好簡單，當時覺得張畫同影嘅相差唔多，畫得好逼真。」再追問𠵱家會唔會拿出來研究？棠哥帶點尷尬回應：「唔需要，咪當係一幅畫咁囉。」

有慰問老友基哥

棠哥跟基哥相識幾十年經常孖住搵食，所以好老友，前者亦有慰問後者，更承認有「剝吓花生」：「其實我冇乜點理啲八卦嘢，只係網上彈出相關新聞，我無意中睇到後問佢發生乜嘢事？佢就講咗少少我聽，(有乜意見畀佢？)我唔敢畀咩提議，唉！基哥都幾十歲人啦，佢應該會解決到，今年我哋暫時都冇合作。」

棠哥和基哥相識幾十年，經常拍住上搵食。

兩人堅老友。

李龍基、葉振棠識咗幾十年。

Chris好識做，繞住基哥及老公親密戰友葉振棠。

一把年紀著重健康

另外，今年80歲的棠哥亦有大搞作，除已宣布舉辦最後一次個人演唱會外，並於本月推出最後一張個人唱片，新碟限量推出5000張，扣除成本後全數撥捐奧比斯眼科醫院，幫助跟他一樣有眼疾的病人。他透露新碟由劉德華演繹《忘盡心中情》、譚詠麟唱《大內群英》主題曲、葉麗儀唱《大俠霍元甲》插曲，還有張衛健、夏韶聲及周吉佩等唱他過往的經典名曲。棠哥有感而發，自言一把年紀身體健康最重要，因為年紀越大視力會越差，𠵱家他只得正常人10份一的視力：「都擔心唔到咁多咯，唯有面對現實，尤其紅館機關重重，做show前要走多幾次位，小心為上。」