七師傅醒你輕鬆吸貴人避凶妙法帶陳曉東反轉廟街唱老歌High爆賀年丨獨家

更新時間：07:00 2024-02-16
發佈時間：07:00 2024-02-16

踏入龍年，陳曉東跟七師傅(七仙羽)大玩 crossover，先搞搞震炒熱廟街夜繽紛，刺激香港經濟；再化身「東七」組合殺落「紅館」(懷舊歌廳)，興奮大唱《歡樂年年》、《東方之珠》應節。嘹亮歌聲令台下觀眾拍爛手掌，high爆東東更懶理唱到甩晒beat的師傅，跟駐場熟女歌手於小舞台上翩翩起舞搶晒fo，唱完更大爆在內地工作經常「瀨嘢」，而家行得走得絕對執身彩。採訪：方騫平攝影：鄧國良

東東及七師傅化身「東七」組合，殺落廟街刺激香港經濟。

當日一身人形利是封的七師傅，拍住有巨型龍頭金鈪「護身」的東東落區，前者陰陰嘴笑浮誇的後者：「龍頭都出埋喎？」東東得戚回應：「要用金光閃閃龍頭嚟吸金及闢邪，要用啲金器嚟射住大家，被閃親嘅都會行好運！」

七師傅對東東戴住嘅巨型龍頭金鈪大感興趣。

東東有巨型龍頭金鈪「護身」。

七師傅陰陰嘴笑。

笑咗。

世界級明星助燒烤

兩人出巡期間成為流動「打咭」勝地，街坊都大讚兩人靚仔、靚女；又有人叫七師傅做「仙女」，甚至有途人搞笑地問東東攞電話號碼，東東出道多年非省油燈，笑住話「我老婆唔畀！」當兩人行到去串燒檔，東東更親自為來自印度的旅客烤串燒，七師傅笑指旅客好lucky，因為獲世界級明星下廚，著對方上網搜尋Daniel Chan資料。

去年生日會上，東東表示已入紙申請8月的紅館檔期，希望能成事。師傅為人為到底，第2站帶東東去唔使申請，可自出自入唱歌的「紅館」(懷舊歌廳)！既驚且喜的東東好奇追問七師傅：「平日你有冇唱歌？」師傅口快快連講兩次：「我鍾意唱你首《賣火柴》。」東東忍唔住更正：「係《劃火柴》呀。」七師傅若無其事說：「一樣啫。」待東東夾好key後，七師傅在台上宣布：「紅館演唱會就喺呢度開始喇，呢個演唱會搞到好亂呀，啲人可以隨意上到台，不過個台好穩陣呀。」眼見東東好滿意「紅館」show，七師傅再玩大啲，push埋駐場熟女歌手上台伴舞：「齋唱唔跳舞？阿姐伴舞呀。」東東即被氣氛帶動又唱又跳high到爆，唱到最後還向台下觀眾揮晒手，提前玩爆「紅館」。

上台遇意外被狂笑

另外，屬兔的東東連犯兩年太歲令元氣受損，七師傅指東東好堅強，而且做事比較穩陣，所以唔會損手爛腳，但要留意太歲年會同老婆多咗「拗撬」，師傅還爆料：「佢大把錢，唱歌只係為興趣。」東東避談富貴：「咁都想有啲新作品。」面對大環境唔係咁好，東東分享逆境心得，笑中有淚：「我試過喺內地拍戲隻腳叉咗落坑渠，要當眾除褲淋清水去污；又試過喺內地一個頒獎禮中，唱唱吓歌個舞台突然間穿咗窿，我一隻腳插咗入去相當狼狽，見劉德華、陳慧琳狂笑，我秒速爬返起身，扮型去多謝觀眾…其實冇受傷已執身彩，發脾氣係解決唔到件事，每個人都要向前行，幾咁好，幾咁差都唔會去到最盡，所以保持心態平衡好重要，要同自己講『我可以撐過去』。」

MIRROR繼續有運行

2024年踏入九運，七師傅叮囑今年唔好掂樓市股市，因為股市會有大波動，最多遊走14000至22000點內，唔係個個有錢玩得起；喺九運嘅樓市更會大跌最少3成，但之前升得太高又未到撈底。至於犯太歲的，太歲年唔好搞生意；可多放啲水種鮮色花來催旺東面『人緣位』吸桃花；西北文昌位放13層文昌塔及綠色大葉植物吸大貴人，有助名利雙收，個人都會靚啲。另外，九運雖然旺中女，但MIRROR繼續有運行：「因為冇人鍾意睇大媽唱歌㗎，佢哋成個Team都當旺，冇人阻到佢哋氣勢，就算姜濤身形變肥都不受影響，因為佢一生都好紅好旺。」