黃建東變身網上飲食KOL搵真銀 儲夠首期想買1000萬樓做業主丨獨家
發佈時間：07:00 2024-02-29 HKT
黃建東於2022年奪得全能司儀選拔大賽冠軍，又擔任過幾次大騷司儀，令他對做主持信心大增，加上一向愛飲飲食食，決定在網台開飲食節目《東eat》。踏入龍年，東東望靠網台確立「為食東」飲食KOL形象搵真銀，仲有大騷司儀長做長有，最想自己孭飛主持節目。採訪：杜杜 攝影：錢文坤 髮型:Jack Hung @ Dazzle Hair 場地:The AIR (The ONE)
為食東東笑言早已放棄減肥大計，所以去年底決心開網上節目《東eat》講飲講食，「之前做《鄰住買》直播，我賣食品係好賣到，啲人見到我食就會好想食，我唔係扮出嚟，係從心而發，酸菜魚真係成碟食晒，希望《東eat》拍多啲食嘢片，發展成為飲食KOL。」4年前他為爆乳老闆娘剪綵報導在網上翻hit，令東東更有信心搶流量，「2個月前有網站再post出嚟，新聞去埋內地同台灣，我就食住個勢拉埋老闆娘一齊講吓食，冇宣傳下都有20萬點擊。」
恨擔大旗主持感性節目
司儀大賽奪冠後，東東做過台慶、東華及仁濟等大騷司儀，新1年希望可以做更多，甚至可以擔大旗主持節目，而除了擅長講飲食外，還想玩感性，「係時候轉一轉形象，做啲感性啲嘅節目，訪問一啲社會上被忽略嘅人，了解多啲基層嘅故事，喺電視播，大家會更加關注佢哋，幫到佢哋。」其實他平日都愛做義工，「自己有能力就探訪多啲公公婆婆，或者有需要嘅朋友，送多啲溫暖畀佢哋。」
東東想上車做業主好耐，政府剛推出樓市減辣應該幫到佢手，「上年考慮過上車，但聽講樓巿會再跌，見今年近乎摸底，依家都物色緊。」他目標是近港鐵站1000萬樓下單位，「我又唔揸車，作息又唔定時，會好夜返屋企，唔近港鐵站係有啲麻煩，另外相士話我啱望水嘅單位，就算望唔到海，望泳池或者擺盤水都得。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
