洪嘉豪自命平凡又普通 憑努力成就紅館夢 預告有突破演出
發佈時間:21:15 2024-04-08
洪嘉豪將於4月13日至14日在紅館舉行兩場《洪嘉豪演唱會2024》。首度踏足紅館開騷的洪嘉豪,表示今次演唱會以他的名字為名,並非個唱想要表達自己,而是想藉着「嘉豪」這個普通的名字鼓勵大家。文:鄺芷瑩 圖:譚志光
談到自己的名字,洪嘉豪直言:「大家都睇過網上啲Post,十大撞名名字中,『嘉豪』係有份。一直以來有人會話我唱歌、外貌普通,連個名都普通!嘉豪呢個名係普通,但有鼓勵作用,有啲人覺得出世改咗平凡嘅名或外貌唔特出,就會限制自己。嘉豪係好平凡嘅名,但憑着努力同嘗試,咁平凡都去到一個唔平凡嘅紅館開騷。」
獻唱新專輯歌曲
洪嘉豪透露今次個唱主要演唱個人作品,其中一Part經已度好,就連歌詞都是度身訂造,更大賣關子演出上將有小突破,他說:「如果做得到都精彩嘅!但我戴定頭盔先,我驚自己做唔到,就算做唔到,都盡量做到8成,呢個突破係需要勇氣同一定嘅信心。」向來唱抒情歌的洪嘉豪,並非擅長跳舞,他笑言今次未必有勁歌熱舞,但一定有歌曲同跳舞,因為本身的歌曲並非勁歌,反而會有輕快歌配合跳舞,他認為跳舞最難是排舞師編排舞步後,自己盡量要跳得似對方,他說:「如果要我跳到好似好勁嘅舞蹈員就無可能!但我還好,運動細胞唔錯,之前做過一、兩次騷,所以我都知自己去到咩環境。」上月剛推出新專輯,當中的歌曲亦會在個唱上獻唱,他說:「好多原聲大碟同冷門嘅歌,已經喺上次個人騷唱咗,今次想替代返!正如大家覺得我較多抒情歌,如果好多慢歌放入歌單會比較沉悶,所以會造啲同以前好唔同嘅歌。」
![早前獲唱片公司大晒金錢,前往日本拍攝唱片封套及MV。 早前獲唱片公司大晒金錢,前往日本拍攝唱片封套及MV。](https://image.hkhl.hk/f/1024p0/0x0/ll/sthl/fe47c212d8d7c86f6389faaf344b04a6/2024-04/416538643_389777110246670_3911173655966298984_n.jpg)
![2年前在西九首次舉行個人演唱會,有由細看他大的軒仔張敬軒做嘉賓。 2年前在西九首次舉行個人演唱會,有由細看他大的軒仔張敬軒做嘉賓。](https://image.hkhl.hk/f/1024p0/0x0/ll/sthl/6b97ef175419d9e8b35f4e005f61dc40/2024-04/SA9_3023a.jpg)
![演唱會門票被秒殺,為他打下一支強心針。 演唱會門票被秒殺,為他打下一支強心針。](https://image.hkhl.hk/f/1024p0/0x0/ll/sthl/6465a43a73dbf699841c5320730f832d/2024-04/WhatsApp_Image_2024-04-08_at_17_43_32.jpeg)
紅館個唱成里程碑
對於不少歌手以登上紅館開騷為目標,作為90後歌手的洪嘉豪,直言見證好多前輩歌手在紅館開個唱,認同是一個很標誌性地方,所以他會視紅館演出為重要的里程碑。談到今次邀請的嘉賓,洪嘉豪笑言每位入場的觀眾也是自己最好的嘉賓,不過已構思好屆時會以特別方式介紹一位嘉賓出場。而洪嘉豪媽媽曾任張敬軒經理人,問到今次紅館開騷媽媽可有給予意見?他說:「有時我都會同佢傾訴吓煩惱,例如內部認購唔夠飛!唔知係咪盲目支持個仔,佢會話呢啲唔關你事,總之唱好啲歌、練好啲舞!間中仲有啲訓話。」
《星島申訴王》已推出全新項目「我要讚佢」欄目,現誠邀市民投稿讚揚身邊好人好事,共建更有愛社區。立即「我要讚佢」︰ https://bit.ly/3uJ3yyF
想睇更多精彩內容,請立即瀏覽「區區有申訴」活動專頁,https://bit.ly/41hgS9E
《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ