林秀怡梁凱晴狂食增磅又便秘超慘彭慧中拍《吃貨》逾10日食近70餐丨獨家

更新時間：06:00 2024-04-12
發佈時間：06:00 2024-04-12

彭慧中（Phoebe）、林秀怡和梁凱晴主持的《吃貨橫掃深圳》，不斷食兼大騷靚身材，觀眾睇得過癮，但三女有苦自己知，因為她們在深圳拍攝10多日，每日食足6餐，為節目增脂都叫值得，但最慘秀怡和晴晴「有入冇出」，成程Keep住便秘肚谷谷。另外，三女雖然首合作，但拍得開心，希望未來轉戰其他地方延續吃貨旅程。採訪：杜杜攝影：Stanley

3人不擔心被指抗拒留港消費，「間中去吓當旅行。」

3人異口同聲話似同朋友去旅行一樣開心，想《吃貨》去外地拍新一輯。

首拍飲食節目的晴晴覺得好新鮮，想不到自己有此吃貨實力，「一日拍3、4間餐廳，加埋中間放飯再試其他嘢食，不斷食，冇諗過自己食到咁多嘢。」最慘即肥4磅，仲便秘𠻹，「頭幾日去唔到廁所，飲西梅汁都唔得，要着泳衣拍攝嗰日勁擔心！」兩位師姐大派定心丸， Phoebe說：「佢都不知幾靚幾fit，諗多咗之嘛！」

要猛男唔要陸浩明

貴為「流行都巿女神」的Phoebe，上輯《掃泰國》狂着泳裝，秀怡爆她今次更激，「佢直情冇着！哈哈！佢要做spa，仲有晴晴陪佢！」同屬有料之人的秀怡竟然免疫，「導演有話要着！我仲帶咗7套泳衣，佢見到我真人就話算，淨係叫佢哋着，哈哈！」她認為是不幸中大幸，「我有便秘搞到肚凸咗出嚟，成10日都去唔到，返到香港先得，可能每日拍到夜晚10點先返酒店，寧願瞓好過坐廁所。」Phoebe好同情：「好慘，幫佢諗咗好多方法都唔得。」

晴晴貴為2021年港姐亞軍，身材有返咁上下。

Phoebe包毛巾做spa，一樣好有睇頭。

秀怡冇份晒身材，同陸浩明去試韓式spa。

最有經驗的Phoebe分享拍飲食節目小技巧，「拍食物時千祈唔好食住，真係拍食嘢先食，冇咁易食太多，亦都試到最新鮮感覺。」她亦不擔心講食後感會詞窮，「用表情搭夠，等觀眾睇到我個樣就知有幾好食。」她又希望《吃貨》系列能長拍長有，「依家日元低，可以去日本拍，歐洲都好，我未試過去咁遠拍飲食節目。」聽到有得飛外地，秀怡和晴晴勁雀躍，仲想搵猛男陪飛起陸浩明，「幫手拎吓嘢，仲可以騷肌肉，等女觀眾都開心吓。」