42歲吳慷仁8年狂為角色增減磅知驚收手《但願》演吸毒阿伯一個月速減22磅超傷身丨獨家

更新時間：07:00 2024-04-12
發佈時間：07:00 2024-04-12

金馬影帝吳慷仁主演、祝紫嫣執導電影《但願人長久》，在周日（14日）舉行的金像獎獲4項提名，包括最佳男配角及新晉導演。慷仁為接演年老父親「林覺民」一角犧牲好大，狂減22磅，又在街頭留連成個月學癮君子及阿伯行路姿勢。不過8年來6次為角色增減磅，全程以廣東話受訪的慷仁承認擔心身體負荷唔到，以後會轉換方式，「42歲嘞，唔可以成日咁樣。」採訪：杜杜攝影：Stanley 髮型: KeithWong(慷仁)、DennisTsui(祝紫嫣)@ArtifyLab 化妝:ShuenKong(慷仁)、Kyo Lee(祝紫嫣) 服裝:Dunhill(慷仁)

慷仁雖然愛拍港產片，但承認冇信心全程以廣東話演出。

祝導在慷仁鼓勵下，已積極籌備第2部作品。

慷仁大讚祝導年青有為，很有自己想法，對演員亦很有耐性。

2008年，吳慷仁由模特兒轉型演員，首部電影《渺渺》的監製正是關錦鵬，成為祝導成功邀他合作《但願人長久》的契機，祝導稱，「係聯合監製（李）駿碩提議先，慷仁睇到劇本，再睇到監製係關導，更加有興趣。」雖然42歲的慷仁跟老年「林覺民」有段距離，但祝導仍決定用他，「慷仁都有問點解唔搵50歲嘅演員，年齡上接近啲演起嚟有說服力，我好鍾意睇以前嘅日本戲，小津安二郎《東京物語》笠智眾都係50幾歲演70幾歲，冇話受年齡限制。」

慷仁戲中演兩女之父的湖南新移民，故事橫跨20年。

祝導自編自導自演《但》片，戲中演慷仁的長女（左一）。

史上最親力親為影帝

《但》是祝導半自傳式故事，問到慷仁是否有特質跟祝爸爸相似？慷仁即尷尬笑，祝導亦笑着否認。開機前1個月，慷仁已來港做準備，祝導完全估唔到，「佢早多一個月嚟，話要聞香港嘅氣味。」祝導更驚訝慷仁親力親為做資料搜集，「佢真係不停行路，睇啲戒毒所，去深水埗嘅公園，啲櫈後面全部老鼠，拍攝時臨時演員都要場務清理咗先肯坐，但慷仁會喺度打躉，夏天喺度坐成日，好多演員講做調查，好少人真係親力親為，其實要睇一兩日已經睇到，但要做到神似形似，真係呃唔到觀眾。」祝導又大讚跟慷仁的首次合作大開眼界，「演員做咗咁耐戲，多多少少會有啲油膩感，但佢冇囉！佢謝票時見到燈光有問題會衝過去整，連謝咗3場票，我話演員攰不如走先，慷仁就話唔緊要仲揸機幫全部人影Selfie，佢係個好有工作人員思維嘅演員，仲要冇經理人喎，令我哋溝通嘅透明度好高，第1次見演員咁厲害，最緊要同佢傾偈冇架子，呢個真實，係『林覺民』好需要。」

搭地鐵跟阿伯學行路

慷仁解釋一直沒信心演到年老時的「林覺民」，所以才要求早一個月來港準備，直到試造型，大師級的張叔平給了他不少信心，「第1次定妝，發現他們的表情，覺得可以喎！阿叔都咁樣講，係咪都要相信自己做得到。」形體方面，慷仁就靠在香港不斷周街走作觀察，「搭地鐵見到個老人家，行得好快，差啲追不到他，跟着他出閘及走路，跟着跟着我就同他的姿勢一樣，其實有點好笑，有人在後面學他走路姿勢。」為了更似長期吸毒者，他用不足1個月由136磅減至114磅，他笑言在港的日子特別辛苦，「多留一個月就多一個月嘅痛苦，要唔食嘢。」其實由2015年開始，他多次為角色調節身形，分別為電影《白蟻：慾望謎網》從154磅減至123磅；2016年拍劇《麻醉風暴2》增肥至187磅演假釋出獄；2017年拍偶像劇《極品絕配》減26磅；2017年拍劇《斯卡羅》減24磅；2020年拍電影《我沒有談的那場戀愛》增44磅，他承認擔心身體不能再負荷，「依家身體唔係差，但可能之後唔會變化咁多重量，依家老咗42歲嘞，唔可以成日咁樣，有經驗就好啦！」

2017年慷仁拍劇《斯卡羅》，剃頭外更減掉24磅。

2020年慷仁拍電影《我沒有談的那場戀愛》增肥40磅。

直覺冇機會再拍港片

慷仁深明演員要遇到好劇本唔容易，既然很喜歡《但》片劇本就決定接拍，「每次演戲，劇本唔一定鍾意，有時你係鍾意個導演，有時可能某個非常出名嘅演員喺裏面，有時公司叫你去。」他稱能來港拍戲機會難得，所以份外珍惜，「我覺得《但願人長久》可能係最後一部，上次《非分熟女》都4年前，咁耐先一部香港電影，下一部幾耐呢？每個機會都好重要。」2019年他宣傳《非分熟女》時接受本報訪問，直認恨拍港產片，這次訪問他差不多九成用廣東話對答，「我都有諗過，點解香港人需要畀機會我演香港人呢？下部戲可能唔會有湖南話，全部廣東話我做唔做得到？我唔希望我講廣東話演戲，俾人覺得你唔係香港人，講廣東話咁辛苦，講返普通話啦，要怎樣克服，表演看起來舒服，是個幾大的課題。」

2019年，慷仁跟蔡卓妍合作首部港片《非分熟女》。

一提演員女友即嗌Cut

電影獲提名金像獎新晉導演、最佳男配角、最佳新演員及最佳服裝造型設計，祝導表示對個人獎抱平常心，「今年新導演全部都好厲害，我作為導演更加高興係演員提名，無論（謝）咏欣、慷仁或者造型都好有信心，就算冇攞獎，佢哋喺我心目中都係無可代替。」慷仁同樣以平常心看待提名，更興奮可現場看頒獎者的妙語連珠，「有得參加金像獎就好開心，我好鍾意睇頒獎人講話，真係好幽默，真係笑到我呢，咁樣都可以講，希望今次好笑，有啲幽默嘅嘢畀我學吓。」他為免給自己壓力，出席任何頒獎禮都不準備謝詞，「得獎感言想太清楚，得失心會多啲，如果唔諗會輕鬆啲，多謝邊個邊個都知㗎啦！」去年在金馬獎封帝時，他忘記在台上感謝女方要去到後台補飛，笑他這次記得多謝台灣演員女友邵雨薇，他即面露甜笑：「哎哋！cut！哈哈！」