86歲余慕蓮瞓唔到食唔落超忟憎：就嚟死喇唔慣住護老院暴瘦驚現「雞爪手」丨獨家

更新時間：07:00 2024-05-02
發佈時間：07:00 2024-05-02

因為家傭要返印尼探親一個月，86歲無兒無女的余慕蓮(魚毛)被迫初體驗護老院生活，面對晚上要着尿片、隔日由姐姐幫她沖涼，魚毛姐周身唔聚財，瞓唔到又食唔落，住唔夠一個月就瘦到皮包骨落晒形，被假新聞老屈加上冇得自由自在喺屋企翻睇《中年好聲音2》更令她忟憎狂呻：「就嚟死嘞…」更因太悶，唔覺意大爆娛圈陳年秘聞。採訪：方騫平攝影：朱偉彥

3年前余慕蓮患上肺纖維化及血液炎曾留醫深切治療部，健康每況愈下。為免行動不便的她獨留家中會出意外，吳麗珠安排她入住一間位於港島區，開業僅半年的新淨護老院，魚毛姐所住的是有窗雙人房，環境及衛生都唔差。不過，《頭條日報》記者往探望魚毛姐，發現她冇晒心機及食慾，更暴瘦驚現「雞爪手」。

悶悶不樂的余毛姐形容處於等死狀態：「朋友陪我去食嘢，都食唔落，唔想去，醫生話我過瘦唔夠營養，叮囑每日要飲3次營養奶。嗰日覆完診順道返屋企交管理費，連保安都追問我『點解瘦咗咁多？』我就答佢『就嚟死喇！』」院方怕她跌親，要求全日用尿片，但魚毛話唔慣，只肯晚上用：「半夜急醒被迫屙落條片，有時唔止一篤，所以『噏住』，幾辛苦呢！因為瞓唔安個人變得好忟憎，個樣殘到唔想影相，仲出白髮。」提到護老院生活，她透露隔日有姐姐幫女院友沖涼：「但咪搞！重要部位自己捽返，平時喺屋企都係自己沖涼，傭人姐姐只幫我着衫。」

《中年2》Fans愛古淖文

𠵱家魚毛姐最掛住屋企：「可以自由活動，扶住去廁所，每朝落街踩單車健身器，嗰度啲公公婆婆好錫我，會幫我霸定位；仲久不久去附近戲院睇早場，想食乜就叫姐姐買…」她自爆最近喜歡能歌擅舞的古淖文，好想返屋企重溫《中年好聲音2》，又覺得《福祿壽訓練學院》好好笑：「我冇煲劇，睇喊苦喊忽嘅劇會唔開心，自己都夠慘啦，從來都冇人愛，細佬妹全部係同父異母及同母異父，有事搵家姐，冇事茄哩啡，最憎老母拋夫棄女嫁90幾次，連上官玉都取笑過我『你嫁唔去喇！因為你老母嫁埋你嗰份…』唉！唔講佢哋，會唔開心…所以決定將啲錢捐晒出去，仲打算同教友夾錢幫教會起教堂。」

睇新聞被屈越睇越忟

由於院友早睡早起，魚毛姐帶埋播音機聽粵曲解悶，亦會靠手機上網打發時間，點知越睇越忟：「有啲報道好衰，話我以前窮到住劏房及要問人借錢，嗰啲死人頭唔係記者係作者。」她坦言30幾年前好慳，做完《歡樂今宵》都唔捨得坐的士回家，而且租住有5伙人的分租房：「我租嗰間房幾好㗎，有14吋電視機。」她又申冤：「我使鬼搵人借錢咩？只係我借錢畀人，我旺角間屋都值幾百萬啦。」魚毛姐再爆某個老牌藝人曾經係佢債仔：「年前佢有病，但死要面住浸會醫院，我都係入政府醫院咋。每周醫院追數時，佢就發脾氣話『都出唔到院點找數呀？』最後我幫佢碌住卡先，結果佢分期3年，每月還$2000。」魚毛姐又爆某佢寵壞咗個仔，當年每次飲宴後都打包食物畀個仔，兒子已近20歲，「希望佢長命啲，佢死咗個仔唔知點算好。」

頂唔順曾江超大男人

因為余毛姐好悶，講舊史停唔到，除某個老牌藝人，亦頂唔順已故曾江的大男人舉動：「當年曾江中途加入《真情》當正自己係主角，劇中我飾演佢秘書，有錢又有學歷，但竟然要求我對佢發姣，導演又唔敢逆佢意，真係講多無謂，我唯有向監製提出，快啲寫佢鍾意好姨(薛家燕)，我就同好nice嘅 Joe Junior 。」另外，對住「深情探監KOL」李龍基亦冇乜好感，坦言難頂對方70幾歲仲染粉紅頭：「離晒譜！佢最鍾意搵𡃁妹，以前嗰個女友都好後生。」