陳詠燊曾大膽邀請王家衛慘被勸退《導演·門2》訪問爾冬陞圓入行夢丨獨家

更新時間：08:00 2024-05-10
發佈時間：08:00 2024-05-10

因為2022年監製及主持的《導演·門》深受歡迎，陳詠燊（Sunny）再推出《導演·門2》，能夠訪問仰望已久的導演令他圓夢，就連王家衛亦試過邀請，但被勸退「你唔好諗嘞」。Sunny感受最深是兩輯節目推出時，電影巿道相當懸殊，他望各方面盡綿力幫到業界。採訪：杜杜服裝:FABRIMAN

Sunny稱短期內不會拍《導演·門3》，但可考慮其他電影崗位的節目。

Sunny因為爾冬陞導演才選擇修讀電影，上輯已很想搵對方任嘉賓，今輯終得償所願，「1997年入演藝前，佢啱啱出《新不了情》、《烈火戰車》同《色情男女》，撻着我想研究電影，請到爾生真係好開心。」亦好興奮許誠毅及吳炫輝導演能夠上節目，「有《捉妖記》同《明日戰記》就知會講特技，佢哋咩都肯講，仲係全個節目高度最懸殊嘅嘉賓，哈哈！」

上輯爾冬陞因在內地工作未能受訪。

Sunny感恩每集嘉賓都暢所欲言，傾足2、3個鐘。

為同行盡啲力

在兩輯節目中，Sunny已邀請逾40位導演受訪，可以的話當然想要更多，「偶像韋家輝，『囈』咗好耐都話要閉關，仲有徐克、林超賢、劉鎮偉同程小東，長期唔喺香港。」他笑言成功邀請到某些導演，會考慮為他們開第3輯，「有人話我唔夠膽搵王家衞導演？！我有搵過，透過佢身邊人問佢，有節目想搵佢訪問成數高唔高？嗰個人話『你唔好諗嘞』，當然周星馳、吳宇森導演肯定想搵，如果佢哋肯做，開新1輯都得㗎，哈哈！」

韋家輝是Sunny偶像，可惜兩輯都婉拒了邀請。

今輯Sunny搵來幾位新拍檔幫手主持，包括黃綺琳導演。

講到上輯播出時，港產電影票房達億元，至今輯推出時票房就差得遠，作為電影工作者總會副會長的他感受很深，「古生（古天樂）係會長，我係3個副會長之一，有計劃逐步去幫業界，我喺呢個圈有一定位置，有餘力就去幫其他新導演，譬如我喺社交媒體比較活躍，貼張《九龍城寨之圍城》有千個Like都係幫咗件事，仲有主動問《填詞L》導演黃綺琳，不如出兩個短訪問放上網谷吓都好，希望呢方面盡到啲綿力幫到個圈。」