周啟生唔驚死點評細粒男偶像：走音走到九彩 力撐何伯畀啲錢買開心勿奉獻身家丨獨家
發佈時間：07:00 2024-05-27
62歲的著名音樂人周啟生由13歲開始彈《黃河鋼琴協奏曲》，50年後終圓夢，下月8號自資於荃灣大會堂舉行《搖滾黃河直至世界終結時》音樂會。周啟生認為做人最緊要開心，力撐近期熱爆全城的76歲何伯，認為只要唔牽涉成副身家，何太又𠱁得佢開心，「咪當係畀少少錢做交易囉」。另外，對樂壇仍然有火的他，唔怕被Fans狙擊，再度點評新生代歌手，更大膽直言，「社會變到人人都食屎，我都唔食。」採訪：方騫平 攝影：鄧國良
對於音樂會，周啟生講起都興奮，屆時會有40人管弦樂團及40人合唱團，揼本製作預咗冇錢賺：「幾十歲人蝕少少都係笑嘅，人生有幾多個50年？都想做啲未做過嘅嘢衝擊吓自己。」音樂會故事背景源自二次大戰日本侵華，以《黃河協奏曲》4個樂章作骨幹，再加新的音樂及其作品，如陳百強《孤雁》、葉蒨文《流金歲月》等，原來兩首歌也有小故事：「《孤雁》係我作畀Danny仔嘅，講爸媽經歷二次大戰時，如同走失嘅孤雁由廣州逃難到港澳，最驚險試過伏喺蘆葦草堆扮死屍避過日本仔追殺，所以我好憎打仗。」
崇拜甄妮唱得又身材好
周啟生又爆28歲時創作的《流金歲月》曾被葉蒨文嫌棄：「公司高層黃劍濤同我講『大小姐嫌首歌渣，唔肯唱呀』我幽佢一默『都冇辦法㗎，咪搵二小姐囉』不過我點敢嬲佢呀？佢唱歌好聽，把聲咁靚，身高5呎6吋，身材咁好咁性感，英文又叻…」他急讚完即戴返頭盔：「唔好話我成日鬧人，你數吓呢個年代有邊個好似佢咁正呀？我都想有人叻過我哋，但暫時少見；唔係寸，你搵一個自稱彈琴叻嘅人，我收埋一隻手陪佢玩《黃河協奏曲》！玩到送層樓畀佢。」葉蒨文唔肯唱國語版，最後交到甄妮手上。對於伍仲衡爆甄妮「唔找數」，周啟生力撐「樂壇風紀」為人：「我17歲已跟佢走埠，出發前會畀足訂金，論江湖地位係咪適合批評前輩？正如我點敢批評許冠傑及羅文！我覺得要尊重前輩。我好崇拜甄妮，唱歌叻又有巨肺，年輕時腳幼腰細冇肚腩，應大得大應細得細…哈！𠵱家白骨陰陽劍就多，瘦到咁點吸引到我？」
曾被Fans狙擊拒絕收口
周啟生曾狠批當今樂壇偶像而被Fans狙擊，佢冇嚇親：「如果社會變到人人食屎，唔食就冇taste，我都係堅持，點食屎呀？雖然俾人話我out晒嘅老嘢，但唔能夠拎走我嘅嘢，《獅子山下》、《風的季節》由我編曲，邊個唔識呀？」自言被網民鬧到斗零都唔值，但他仍拒絕收口，笑20幾歲偶像個肚腩好似西瓜咁大，唱歌又走音，陳年老偶像個肚就好似孭住個雪櫃。他語重心長表示，「年輕偶像唔可以肥，對自己要有要求，否則人哋點值得愛你？不過都只係紙紮偶像，逆市下廣告收入大減，又狂被抽佣都所剩無幾，如泥菩薩落水即溶。」
讚Marf馮允謙唱歌有Feel
因為抱住「唔知人哋渣，點知自己好。」心態，周啟生乜歌都聽，「身材、樣貌、高度都唔達標嘅偶像錄音好正，但唱紅館現場走音走到九彩；又唔明點解商台會頒獎畀唔啱音女歌手。」不過，有彈都有讚：「Marf(COLLAR成員)唔係皮包骨，幾型幾靚，但唔了解佢唱功，佢嗰隊柴娃娃冇樣啱音；Jay(馮允謙)都幾正，斯文靚仔，唱歌有feel，可惜唔夠紅。」
周啟生認為做人最緊要開心，見到全民齊插何伯，他忍唔住幫口：「佢都幾十歲人，做乜都得啦，甚至可以同其他女人有任何關係，但唔好要啲仔女擔心佢嘅錢銀，唔好牽涉到成副身家，如果個女人𠱁得佢開心咪畀少少當交易囉，一夜夫妻千二蚊都ok呀，咁樣嘅話我支持何伯！但要畀100萬就貴咗啲喎，Jennifer Lawrence (珍妮花羅倫絲)100萬就ok。」周啟生更為何伯計數：「𠵱家何伯送咗30幾萬禮物畀新何太，扣除伙食費、湯料及補品，當每次花費500至1000元，76歲嘅何伯到百年歸老，都冇50至60次交易啦。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
