梁靖琪入行二十年演技終獲觀眾認同：鍾意咪慢慢做好！

影視圈

更新時間：20:45 2024-06-10
發佈時間：20:45 2024-06-10

於現正熱播劇集《家族榮耀之繼承者》中飾演富家女Nana的梁靖琪（Toby），雖然已在戲中離世，但這次Toby演技大爆發，其中一幕發現與飾演其父親的羅嘉良冇血緣關係而大受打擊，與家人共餐時拎住紅酒飲的她，帶有醉意諷刺家人的關係十分混亂，演技贏得不少網民讚賞。圖：鄧國良、林賓尼文：鄺芷瑩

梁靖琪（Toby）坦言獲邀演Nana角色時，自言好有壓力，但導演鼓勵她，認為她一定做得到，當考慮過後發覺充滿挑戰性，自己亦從未演過這類角色，於是答應接拍。她說：「以前都係演乖乖角色，我覺得今次幾好喎！真係搏一鋪試吓，Nana其實係一個情緒好大起伏的人，由佢剛剛到死嗰刻，我盡量演到有層次感，不過有日拍到唞唔到氣又嘔，拍完一個月我仲手震，以為自己唔夠瞓，睇醫生驗血，話我太大壓力啦！」

不敢看網上評論
Toby表示劇集播映首個星期，由於有不少批評，直情不敢睇評論，但得知有報道以「本人鄭重向梁靖琪道歉」為題，有網民為了曾把她睇低一事而致歉，更讚她演繹出瘋癲感覺，令她很開心。她說：「有人send畀我睇呢個新聞，我唔係好識睇中文，就問我老公講乜㗎！睇完之後，我先敢慢慢睇返啲評論。」Toby坦言演出該劇後會更夠膽嘗試跟自己反差很大的角色，更憶述當時拍攝時很快便投入Nana角色，當中有一幕喊戲喊足3個鐘，亦長期有不同情緒的狀態去演繹，所以不少人也會認為演這個角色會疲倦，但令她更加愛上演戲。

獲「撈家」鼓勵
談到戲中與好友佘詩曼（阿佘）與前輩羅嘉良有不少對手戲，Toby笑言不知為何對住自己好朋友會很緊張，其中跟阿佘有場鬧交戲，對方叫她毋需緊張。她指從小認識羅嘉良，大家合作過多套劇集，對方永遠給予自己強心針。她說：「其實套劇播緊時，羅嘉良傳好多訊息畀我話好多人讚你呀！繼續努力，唔好放棄！」談到今次演出給予自己幾多分，Toby表示不敢評分，但最近聽到有人說只要找到自己價值，會得到更大的強心針。她說：「廿年唔易行，但係自己選擇，鍾意咪慢慢做好！」Toby除了是演員身份，亦參與不少劇集的幕後工作，雖然成為人妻，但老公是最支持她的人，反而爸爸梁家樹會勸她辛苦就不要做。她說：「我有問老公我嗰場戲演成點？佢話好！『I'm your big fans』，真係好感動！」

Credits：
場地提供：Bela Offices
髮型：Michael lam @ Beijing hair culture
化妝：劉柏麟 @Stephenmakeup
服裝：farfetch

由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊 https://bit.ly/4csd4qL