張偉文暫離老人院開心又食又和唱 方俊麗莎開酒樓騷狂收「大牛」 丨獨家
發佈時間：08:00 2024-06-14
72歲「靚聲王」張偉文9年前受腰患、糖尿病及腳痛困擾需以輪椅代步，長住老人院冇乜「細藝」，全靠徒弟方俊帶他周圍去。上周五端午節前夕，方俊和「新加坡歌后」麗莎在元朗一間酒樓登台，張偉文都係席上客，難得離開老人院出去鬆一鬆，張偉文笑晒口全晚食唔停，仲跟住台上方俊係咁唱，好有歌癮喎。採訪：方騫平
自從方俊進軍歌壇後，張偉文的忠粉都會支持佢，加埋麗莎fans，當晚場面熱鬧，方俊及麗莎共唱咗30幾首歌，包括《H2O》、《輪流轉》、《相思淚》及《訪英台》等，張偉文就係咁跟住唱，而fans揮動螢光捧，甚至興奮行離個位跳舞及到台前送利是，有啲仲畀「大牛」($500)。
幫麗莎賺多啲「水腳」
不過，原來方俊只係「陪太子讀書」，他將歌酬送晒畀麗莎：「近年病癒嘅麗莎要照顧孫女，雖然久休復出，但5年來都冇收入，之前留港3個月只係喺文化中心開咗一場演唱會，我想佢返新加坡前可以賺多啲水腳，所以先有呢次演出。」除此之外，當晚方俊還請埋一班老人家及照顧者參與：「近日接連發生照顧者輕生嘅悲劇，長年照顧病患者真係有好大壓力，希望出少少棉力，可以幫到佢地紓壓。」
剛55歲牛一的方俊談到生日願望，他希望繼續開到演唱會令更多人受惠：「之前喺《燃亮愛演唱會》中跟視障敲擊樂團The Cheers夾Band演出，佢哋玩得好開心呀，生日前夕佢哋送咗蛋糕及親手造嘅立體生日卡畀我，好有愛！如果張偉文健康許可都可以同佢合體開騷，等佢有多啲精神寄託。」
由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊https://bit.ly/4csd4qL
緊貼最新最快新聞資訊，請立即下載星島頭條App：https://bit.ly/3Q29Vow
