Sumling怕走光難再着：需要找數先用 首出Solo歌MV着「芯」門大開造型丨獨家
發佈時間：06:00 2024-06-28
Sumling（李芯駖）@COLLAR最近推出首支solo歌《SPYLING》，成為第3位成員出單曲，她既緊張又興奮。歌曲以特務為主題，原來她一個人旅行，都愛玩潛藏身份。講到MV以性感「芯門大開」裝演出，她坦承該套衫易走光，難在現場演出再着，「有機會需要找數先用囉！」採訪：杜杜 攝影：譚志光 形象:Daniel Cheung 髮型:Ricky Lam 化妝:Kineks Ho、Jenny Fung 服飾:Dion Lee&The Attico from Lane Crawford、APM Monaco 場地:Pier 1929 (灣仔碼頭）
Sumling同公司有共識，不想為做而做，搵到適合的歌才出solo，而《SPYLING》一聽便愛上，被當中有趣節拍吸引，「中間有段好似有啲特務嘅感覺，好似要潛入啲空間完成任務，幾得意，就同填詞人林寶及MV導演傾。」林寶將退役FBI寫的書《像間諜一樣思考》，發展成歌曲概念，「本書係教人用間諜手法，喺現實生活中得到想要嘅情報，林寶就諗到有時人難免有要隱藏啲嘢，但係某啲時候都應該要做返自己。」
單獨旅行會潛藏身份
現實中，Sumling最愛潛藏身份就是單獨旅行時，「會着到全黑，總之扮到好似當地人咁，唔覺得我係遊客，唔會打我主意。」因她試過在西班牙着晒靚裙，set機幫自己影相時差點出事，「當時係日頭，全個廣場都冇人，周圍有好多保安，我擺低個袋喺相機隔離，校咗10秒行開，但轉頭就見到個男人伸隻手喺我同個袋之間，差一步就掂到我個袋，應該係想偷個袋，佢見我發現即刻讚好靚想同我影相，我好驚即刻執嘢走，嗰次我好遊客樣，之後都唔敢啦！」
講到MV的「芯門大開」造型，Sumling話該套衫並非首選，「係後備第3、4套嚟，試完意外覺得幾靚，設計幾得意，我都鍾意試新嘢，經理人都驚跳舞有危險，黐咗好多膠紙穩陣先用。」不過她講明因太性感，該造型好難現場表演着，「遠睇冇乜嘢，但近睇有少少危險，真係幾性感，或者有機會需要找數用囉！哈哈！」講到近期表演有不少性感造型，她就相當接受，「性感咩？！真係要問吓造型師！我係偏向健康感覺，如果作品或者場合係襯，唔介意攞啲性感特質出嚟。」
