朱晨麗親揭與富二代馬主關係：好感朋友 新劇重返女一捱打搏到盡丨獨家
發佈時間：08:00 2024-06-28
於TVB劇集《輕.功》後，朱晨麗等足兩年終於再有劇上，而且新劇《反黑英雄》中仲係重返女一位置，故朱朱好重視呢套翻身之作，不諱言咁耐冇見，要畀大家睇到朱晨麗仍然做幕前。對於跟富二代馬主史昊洺嘅緋聞，朱朱形容做得朋友一定有好感，亦唔排除發展可能：「我只希望事業快啲可以好啲，自己搵到錢比嫁個有錢人更穩陣。」採訪：方騫平 攝影：譚志光 化妝：Henry Li 髮型：Terrence Chan @HoLA il colpo hair & pets 場地：Studio Meta
朱晨麗於《反黑》中飾演高級督察，和陳山聰雙劍合璧破案。重返女一嘅朱朱搏到盡，除有唔少跑樓梯戲外，仲會打人及首次挑戰被打：「今次拍到手腳瘀傷，keep住跑樓梯攰到不得了！尤其同啲孔武有力嘅大隻仔拍埋身肉搏戲，為求逼真鑊鑊都打得好金，印象最深刻俾人打到揈嚟掏去再撻落鐵板貨櫃，要識得就力，自己都驚會毀容，但一埋位就要扮鎮定。」
最近朱朱與史昊洺傳緋聞，甚至一度傳她懷孕箍實男友，她開腔交代兩人關係：「我哋只係私下會聯絡嘅朋友啫。」語畢朱朱補充句：「但我唔係成日同人聯絡傾偈嘅(係可發展對象？）呢啲唔知，我成日周圍去做嘢，睇吓緣份夠唔夠。」當追問欣賞史昊洺甚麼？朱朱吓了一聲，帶笑推說：「做得朋友嘅印象梗係ok啦。」不過，現階段以事業為重：「我只希望事業快啲可以好啲，因為之前返咗內地拍嘢及去咗拍電影，啲人以為我離開咗TVB唔使做，哈！其實我好勤力搵錢。」
被指樣貌進化得啖笑
對於屢傳有富二代男友、住豪宅及樣貌進化到5.0，入行14年嘅朱朱唔再介懷反而形容得啖笑，她哈哈大笑道：「用美圖app影相話百變樣；喺café彈琴、借朋友屋企露台『打咭』話我搬豪宅；富二代又係我男友…可能啲人想我過得好啲，所以有咁多幻想，多謝大家畀我咁多娛樂性，我會努力㗎啦，最重要身邊人知道真相！不過，當然有對象有實力可鞏固生活，但自己搵到錢比嫁個有錢人更穩陣。」
