黎振燁患蛋糕恐懼症：已戒甜 偷食朱智賢4年首開腔道歉望畀條生路丨獨家
發佈時間：07:00 2024-06-29
現年38歲港男出身嘅黎振燁，2020年4月被爆背臨盆孕妻搭上TVB前小花朱智賢，兩人去到山旮旯幽會，在車廂內偷食蛋糕甜蜜慶生，形象插水嘅黎振燁已在無綫「自然流失」。深潛4年的他最近「上水」，除向受害者道歉外，仲公開求情，望畀條生路，還自薦跟古天樂做牛做馬。被追問𠵱家可有蛋糕恐懼症時？他呆一呆，說：「我冇食甜嘢好耐啦。」採訪：方騫平 攝影：朱偉彥 場地：十八夢
黎振燁被封「翻版古天樂」，被爆偷食前受TVB力捧。時隔4年，已獲老婆原諒的黎振燁發揮生產力「升呢」成為兩子之父；至於37歲朱智賢去年9月已離巢外闖，而當日陪住女友出席認錯記者會的謝東閔，繼續留守做背後男人，不離不棄。
肉赤老婆被屈報料
月前黎振燁正式跟TVB完約變身失業大軍，他坦言前路茫茫，好嬲自己：「作為自由身演員冇咗公司照顧，要重新尋找方向難免有一定困難，搞到咁徬徨，令自己咁麻煩真係好後悔，明明行到去山頂，點解我可以令自己受傷，碌咗落去谷底？仲要傷害埋愛錫自己嘅人！還幸仍有傳媒關心我動向，唔算係最差嘅結果。」呢個大教訓警剔他，做人要有自制能力睇清楚要點行：「唔好輕視價值觀，咪以為自己可以橫過到錯誤，原來最後有好多關都過唔到。」黎振燁最肉赤老婆仲要受委屈，誤傳係「車廂偷食事件」報料者，挺身強調老婆唔係加害者：「唔好傷害一位受害者！佢所有嘅嘢我都清楚。(事件中得4位主角，『加害者』已呼之欲出？)冇必要知啦，重點自己都做得唔啱，唔好怪人。我反而要多謝嗰個人，否則連個家都冇埋。」
自薦跟古老闆搵食
至今黎振燁欠當事人一個道歉，他即尷尬地扯埋TVB高層曾勵珍、監製陳耀全，甚至全公司嚟講，表示要向所有受影響嘅人致歉…及後才補充對當事人的歉意：「我撇開唔講呢件事對大家影響及經歷係點，我係好抱歉，原先可以避免到嘅事情，但自己冇去避免，事件真係影響好大，令到大家人生留下有不必要嘅烙印，希望有關人都可以過返本身想過嘅人生及道路，事件總有一日會過去的。」他承諾會做好自己彌補缺失，更公開求情：「自己唔係一個聰明人，但唔會蠢到覺得經已冇事，可能係一生人嘅烙印，我只求一個機會畀我做好自己，沖淡一生烙印。」同時，黎振燁正學習面對自己，成為兩子反面教材：「小朋友有夢想，作為爸爸會鼓勵，但，如果連爸爸都因為逃避責任及過錯，要放棄演員夢，就冇資格叫佢哋要堅持…我要畀佢哋知道就算要披荊斬棘，都要為做過嘅錯事負責任，我寧願筋疲力竭、七勞八傷，冇晒辦法才會結束演員夢。」提到將來打算時，黎振燁指馬死落地行，透露𠵱家家庭開支由老婆頂住，他跟朋友學做幕後：「我好熱愛演戲，每個角色都好畀心機演，老婆亦會畀意見，佢都好鍾意睇我嘅戲。除想做返幕前，創作、編劇及製作乜都想試吓，之前曾膽粗粗寫過溫情，科幻劇本，唯一唔識寫愛情小品，但全部未達標。」眼見古天樂推出「新晉編劇學徒計劃」，黎振燁大感興趣自薦：「我好有誠意由低做起，跟古老闆做牛做馬，任勞任怨都得，不過，我唔知佢度門喺邊，更加唔知有冇資格，始終做幕後只係門外漢。」
有自制力唔吼蛋糕
另外，清減咗嘅黎振燁自「車廂偷食蛋糕事件」後已戒甜，唔多吼蛋糕，問到係咪有蛋糕恐懼症時？他忍唔住尷尬笑說：「我冇食甜嘢好耐，少啲食啦，所以瘦咗，我唔為食，除非老婆要慶祝，想食就避唔到。」最後他慨歎人生好長，好難有一個完美冇憾嘅人生，但相信只要努力誠心去改，破釜沈舟一定做到想做嘅事。
