麥紫莉公開搣甩30磅力保34G之謎 「偽港產AV女優」晒18吋癲幼腰首出寫真集 丨獨家
發佈時間：07:00 2024-07-15
27歲「偽港產AV女優」麥紫莉（Chili），近年成功搣甩30磅贅肉，憑34G、18、34魔鬼級動漫女身材，拍攝首本寫真集《Chili Flavor》。行過唔少瘦身冤枉路的Chili，靠做健康管理營養師成功由140磅減到110磅，最難得力保34G巨胸，更由32吋腰變18吋，坦言是「努力嘅痕跡」，確實值得耀武揚威。採訪：杜杜
2017年Chili宣稱赴日本拍AV被踢爆講大話，相隔7年依然好後悔，更坦認失去不少演出機會，「唔會有人想用一個冇信用，臭名遠播嘅人去做嘢，所以好感激好多謝，依然願意搵我做嘢嘅人，一直記喺心。」講到當年她稱拍AV是希望賺錢給患腎病母親醫病，追問母親目前情況，她堅拒回應，「關於我家事，唔攞出嚟講嘞，唔想屋企人再受影響。」對於素海霖成為香港首位AV女優，Chili未睇過對方作品，但就相當欣賞對方，「覺得佢係一個講得出做得到，好勇敢嘅人。」
拍戲要露點即推
Chili趁住工作量不多，瘋狂讀書增值，除上演技及歌唱班外，還有讀一直好有興趣的健康管理營養學及中醫課程，「都有報讀西班牙文、心理學，未來再去報更多課程，發掘吓自己興趣，珍惜自己。」
以往做文職的Chili，目前擔任健康管理營養師，但她強調並非減肥成功而去教人，「我唔係減肥減到變專家，最多叫做有啲經驗同少少心得，真係要讀同埋去考牌。」講到今次出寫真集，原來已計劃了幾年，但因疫情延期，「希望畀大家見到我有改變同努力，至少身形上畀大家見到先，知我有決心喺呢行發展，可以有更多工作機會。」拍寫真集可以超性感，但工作絕非冇底線，「之前有套戲搵我，需要露點，雖然角色頗重要，我冇猶疑推咗，依家就算同我講係女主角，但要露點我都唔會拍，呢個係我底線。」
滿意18吋馬甲腰
5呎8吋的Chili，為了影寫真集搣甩30磅贅肉，變成110磅34G、18、34的動漫女身材，當然有試過用錯地獄方法減肥，「最癲就係3日淨係飲水，完咗之後嗰日每餐淨係食一隻烚蛋同埋加少少菜，跟住之後連續5日都淨係飲水，不斷循環，呢個方法係短時間落磅落得好快，但好唔健康，同埋減嘅多數係水份，一食返嘢好易反彈，千祈唔好學。」問到如何做到瘦身唔瘦胸？她認為是先天優勢，「可能我係乳腺型嘅胸，曾經聽醫生講，胸部有分脂肪型同乳腺型，胸部脂肪比較多，減肥會令個胸縮水。」
講到最滿意身體部位，竟然唔係澎湃上圍，「以前最滿意隻手，冇乜bye bye肉，係幼嘅，依家多咗一個部位，就係腰，因為有我努力嘅痕跡，就係馬甲線。」巨胸更影響她揀衫，「一直好想試偏可愛衣着，但着上去唔係嗰回事，着得鬆身或遮得太多肉，好容易顯肥同太大隻，露得太多，又有種風塵味，好難拿捏。」拒透露情史及感情狀況的她，坦認惹火身材，絕對影響感情生活，「一定有遇過啲純粹想發生性關係嘅人，佢哋唔會有呢個機會，呢類人冇機會成為我男朋友。」她又指若然有男友，出寫真集會事先知會對方，「唔想佢喺其他途徑上知，係最基本嘅尊重。」
