43歲袁偉豪努力保養期待同囝囝遊車河 自認大叔仍不忿網民為流量嘲衰老丨獨家
發佈時間：07:00 2024-07-23
袁偉豪（Ben）在《反黑英雄》首度演殺人如麻大反派「陳祖耀」，他演得過癮，觀眾亦睇得投入。不過他的狀態再度成話題，他就不忿網民為流量才經常嘲他衰老。他坦認畢竟已年屆43歲大叔之齡，加上早年捱壞身子，但已努力保養。升呢人父的他，開心囝囝袁晞祐（乳名：袁咕碌）已識叫「爹爹」，期待等囝囝大點一齊遊電單車河，還透露有意追個女。採訪：杜杜 攝影：譚志光 場地:Velo Italian Bar & Grill
Ben對於演大反派，完全不抗拒，還形容「陳祖耀」，「呢條友幾型，幾勁喎！好愛恨分明，有仇必報，亦都好重情義。」他選擇以踏實方式演繹，更得到認證，「差唔多拍完監製話『幾好睇，有啲嘢喎』，我就覺得呢件事成功咗一半，走啱咗方向，只係觀眾會點睇，係咪真係會咁肉赤呢？！原來佢吊頸嗰刻啲人都會話『咁點算冇嘢睇喎』，證明大家代入咗，呢個人係有血有肉。」
拿舊作比較好無謂
Ben近期每逢有劇播，外界着眼點不是演繹，反而更留意他的狀態，他坦言覺得好無奈，「𤷪梗係會有，點解要咁啫？！成日講衰唔衰老，又斷涯式又旋風式。」他分析外界拿舊作來比較，認為相當無謂，「點解「天堂哥」（《使徒行者2》）會變成咁？！『天堂哥』係7年前㗎啦，唔該！《鐵馬戰車》個『司馬sir』 10年前㗎啦！嗰時33歲，今年小弟已經43歲，「牙佬」係34歲，係最fit，最當打嘅時間，人生最健康、能量最高，回氣回得最快，最襟捱嘅時候，嗰時仲要高清，𠵱家係睇緊4K、8K，同期我又拍緊兩個劇，又做咗人爸爸，個樣少不免有啲殘，現場環境又惡劣，個妝甩得快啲，咪又見到我更加攰囉！」他又笑言已自稱uncle，「成班世姪，都係叫我Uncle Ben，𠵱家我覺得大叔好型，冇貶意！」
Ben強調不會為這些聲音，放棄搜尋有關自己工作的消息，更會忍不住出手澄清，「佢想要流量，做啲話題出嚟，唔係啲正常人嘅用戶，而我見佢有啲嘢想做，咪回應佢其實我唔係肥，喺我工作生涯裹面，我應該冇肥過，未試過有肚腩。」他最不忿是網民一句話，隨時變成新聞，「你話我殘都算，仲要話埋我有肚腩，我日日飯都冇得食，就係為咗個角色想fit啲動作打得快，你一句話我有肚腩，我又畀啲傳媒講話我走樣有肚腩，咁係咪𤷪先，所以我咪話畀佢聽唔係肚腩嚟，係腹肌嚟！」
調整作息努力保養
Ben坦認身體早已捱壞，更笑言每日狀況有「最佳食用期」，所以工作前要提早起身去水腫，「今日做6個專訪，正午12點開始，我要7點起身就係要等自己醒，碌面，就算碌完都係腫到乜咁，都要碌㗎嘛！咪就係年紀大囉，捱壞咗啲內分泌。」他亦好注意飲食，以少甜少鹽為主，「總之少鹽係大前題，唔食宵夜，唔食甜，因為糖化衰老得好快，一定要做運動，跑步同埋做gym，但冇之前個強度咁犀利，以前我會跑10K，𠵱家跑5K鬆啲就收手，驚跑得太多甩水太勁又會攰。」
為了保養兼湊囝囝，Ben更調整了作息時間，「我平均夜晚12點半度就瞓，以前係3、4點都唔瞓，𠵱家唔使開工我都會咁早瞓，盡量7、8點就起身，上午去做運動，晨操完返嚟就去湊BB，陪吓屋企人，夜晚就cut應酬，食飯7點食到10點返屋企，唔會玩到好夜，靠呢啲嚟保養。」
計劃為囝囝追個妹
講到升呢人父，Ben坦認責任大了，連揸快車都會有內疚感，「上年（張）寶兒陀咗 3、4個月，啱啱公佈咗有BB，我同振朗去咗歐洲拍《歐洲鐵騎遊》，我喺德國嗰條冇限速公路揸到200幾公里，揸住電單車爽㗎！聽見啲引擎聲，又有啲風，見到個表180、200、220咁上，完成咗嗰個速度好正，但係之後嗰幾秒就覺得好內疚，即刻就諗我嗰吓炒車，我個人就散，BB點呢？！都未見到我，我就唔喺度咁點算呢？！覺得有啲嘢，唔使去到咁盡，年少時試過呢啲嘢就算嘞！」
Ben提到袁咕碌就冧晒，開心透露聽到囝囝識叫「爹爹」一刻勁興奮，更期待等囝囝大點一齊坐電單車，「佢夠6歲定7歲坐得，我就會畀佢坐㗎啦！佢有意識掹住我，就會帶佢遊車河，喺屋企附近兜吓，或者出去石澳同啲uncle飲吓茶，同吳家樂叔叔，李𤨪琛叔叔一齊遊吓車河，型呀！」他又計劃2、3年後為袁咕碌追個妹妹，「我都係有個妹，佢成長多個人陪伴，起碼唔使對住個公仔講嘢，唔使對住個平板電腦，冇人同佢互動。」
