王晶被血流披面傅聲跟實？憶述好友臨終前樣貌：佢係畀電池撞爆內臟

更新時間：23:40 2024-07-22
發佈時間：23:40 2024-07-22

今晚（22日）TVB節目《直播靈接觸》請來導演王晶分享靈異故事，更提及已故好友傅聲。據王晶所指，當年傅聲離世後，他曾獲高人提點，被傅聲的鬼魂跟隨，他百思不得其解，最終他以邏輯分析事件，認為說法並不可信。

傅聲鬼魂跟着王晶？

傅聲於1983年因車禍離世，終年28歲。今晚王晶在《直播靈接觸》中分享傅聲離世後的靈異經歷，他指：「當時我拍《花心大少》，拍咗幾個月，我同阿叻、傅聲佢哋好老友，日日一齊玩、拍戲。佢撞車出事前我哋仲開咗第二部新戲，已經拍咗7日，嗰日都係開工㗎，點知佢就出咗事。」王晶指事後他透過同事認識到一位福建女人，對方識請關帝上身，「當時套戲開咗7日，個主角又走咗，我又問吓會點啦。傾咗一陣間，之後話『冇嘢啦，咁你走啦』，我朋友就同我一齊走，佢話『師傅同我講，傅聲跟住你，仲要滿面鮮血』。」

王晶：點會跟住我呢，我同佢咁老友

王晶對此說法感到懷疑，「點會跟住我呢，我同佢咁老友。」王晶認為傅聲最多都只是有心願未了，認為對方不會害他，他亦沒有感害怕。王晶回想傅聲最後一面，認為說法不可信：「因為佢唔係滿面鮮血，佢臨走係大家入醫院見佢最後一面嘅，因為已經冇咗意識，得一條屍咁……大家入去個房度，見一見佢。佢係畀電池撞爆內臟，雖然我見佢嗰陣都清潔晒，（身體呈現）青色喇已經，但係係乾乾淨淨，一樣咁靚仔，佢點會滿面鮮血啫。」王晶後續亦沒有找師傅再處理被指遭傅聲鬼魂跟着一事。