陳瑞輝36歲正日生日 女友Christy以長文反擊黑歷史 稱一直以來設局捉「鬼」
發佈時間:18:48 2024-07-29
![陳瑞輝36歲生日,女友Christy以長文反擊之前種種是非。](https://image.hkhl.hk/f/1024p0/0x0/100/none/dc06308d112596eb67a86e765adf1835/2024-07/cats653.jpg)
MIRROR成員Frankie陳瑞輝(皮皮)早前成話題人物,除其圈外女友Christy的黑歷史愈揭愈多,Frankie 亦被爆出軌風波,導致形象插水,就連江𤒹生(AK)、沈殷怡亦被拖落水。今天(29日)適逢是皮皮的36歲生日,其女友Christy亦送上厚禮,將IG由私人轉為公開,並加添了「黑歷史 」的精選動態,以2千字長文大反擊,綜合4點澄清被誣蔑的「黑歷史」,但未幾又將ig 帳戶變回私人。
Christy 將一系列舊Story集合,表示:「記得click埋入去睇我嘅黑歷史,以後唔使旨意再改我圖誣蔑我,扭曲事實帶風向誤導其他人。」第一點,Christy說︰「1)首先我要向所有受影響人士致歉。呢件事要由2021年9月13號講起,朋友告知我被人放上TG Group同連登,內容係誣蔑,指我鍾意搶朋友嘅男朋友,中學生活淫亂,等等。而我留意到某啲照片,係我Ig早已刪除,所以我肯定係身邊熟人做。由2021年9月到12月,間中都會再被人偷我泳衣相、跳舞相放上網抹黑、收到騷擾電話及訊息、扮我嘅假Account等等。」
第二點,Christy澄清表示︰「你哋見到的story,大部份都係假的: 2021年12月頭,我透過跳舞朋友認識咗AK及Frankie,當時我有朋友提議『捉鬼』,所以就將普通對話圖放上Ig close friend story。一開始,我同Frankie講咗呢件事,佢應承幫我捉鬼。所以我有叫佢send相同錄音畀我,令隻鬼信我係同真嘅Frankie傾緊。所以解釋到點解咁多對話都係無頭無尾。去到2022年1月尾,隻鬼終於流出咗幾張cap圖,而呢啲圖都係由Frankie屋企人同朋友傳番去佢度,但係佢冇解釋,因為唔想打草驚蛇。呢個時候,我更想收窄close friend範圍,放相上story引『鬼』cap圖。朋友叫我, Ig close friend list每次只落一個,每日post捉鬼圖,每日畀唔同人睇story,都配有唔同emoji,當水印咁。我就可以知道係邊個抹黑自己。」她續說:「1月之後,就冇再有我捉鬼story流出,亦捉唔到隻鬼,我之後亦將所有嫌疑人踢出close friend list。2022年5月及12月,連登再有post講我,但係一張cap圖都冇,所以我同Frankie以為事件已經告一段落。而我一直都有出story去影射隻鬼,恥笑佢每次嘗試抹黑我都唔成功,甚至提議佢要人信服不妨改下圖同埋作得誇張啲。」而從Christy今次貼出的限時動態圖片見與早前在網上流出的,Caption是有分別。
第三點,Christy表示直到今年6月,被公開Frankie女友身份後,對方又再行動,「佢忍到我公開自己係公眾人物女朋友後,佢就放晒2年前嘅捉鬼story出嚟,有啲相係佢改咗圖,亦有啲相係捏造出嚟。」Christy續說:「我發現佢有一個album,全部都係由我2020年到2024年嘅cap圖。佢當年唔爆其他相,因為佢一直處心積慮,由原本淨係想搞死我,去到而家夾埋外人,想搞死埋我男朋友及MIRROR。佢甚至夾埋其他fans、連登打手不斷誣蔑我哋,又開幾個分身扮fans帶風向。萬一佢發現仍然有人支持Frankie,就會批鬥所有支持者。」她又說,「鬼」叫人到不同平台找出Christy的「黑歷史」,Christy 更懷疑對方有收fans錢去賣她的story截圖及透露Frankie行蹤︰「我懷疑佢有收fans錢去買我嘅story,透露我男朋友行蹤,我每次睇show都會被人偷拍放上佢哋圍內嘅group討論。因為我知隻鬼仍然喺我Ig入邊,所以我好多相唔會即時post,亦有問朋友攞相扮去旅行去誤導隻鬼。」
第四點,Christy表示在6月事件爆出後,誣捏情況更嚴重,「一大堆我唔識嘅人出嚟講我點點點,又話我睇show傾偈,等等。媒體亦唔使factcheck任何嘢就出新聞:正如我口罩小姐原本係表演彈古箏,評判叫我再即興表演其他嘢去拉票,冇準備情況底下先會表演lapdance,咁當然節目出街就淨出咗lap dance嗰段。」她續說:「要去誣捏一個人真係好容易,所有嘢cut頭cut尾加幾張相同字就可以徹底毁咗一個人。我講呢啲嘢,並唔需要你哋相信我,亦唔需要為自己平反,只係想交代返件事。最後有人問,你同隻鬼有咩深仇大恨?我可以答你完全冇,佢2018年已經一直扮friend,2020年開始cap我圖,佢將啲圖post完上網之後仲走來叫我take care babe。」
對於對方的行為,Christy 推測是因為自己做過傳銷,而對方家人家人曾因做傳銷而被騙幾十萬,因此將仇恨投射到其身上,Christy說:「當佢知我俾前男友拉咗入去做之後,就投射個憎恨落我身上。我從來冇叫過佢買產品或者入去做,反而佢疫情期間,有畀錢叫我幫佢買產品。我當時做咗好短時間,亦因為拍咗三年拖嘅男朋友沉迷傳銷而分手。」
最後,對於被指看男友演出時不斷聊天及舉牌遮視線,Christy貼出自己拍的片段否認:「我當日係坐台下左手面,每次男朋友表演都會錄低畀佢睇,畀佢知有咩可以改善所以唔會傾偈,而我拍片舉牌都唔會舉高過頭,所以唔存在會擋住人哋視角。」