Linda昨晚舉行《Remember『記得』‧鍾嘉欣演唱會2024廣州站》，是她相隔10年再開個唱，全場座無虛席。

鍾嘉欣廣州開唱重演婚禮扔花球呵番粉絲獲好姊妹拉隊力撐好驚喜

更新時間：22:45 2024-08-11 HKT
發佈時間：22:45 2024-08-11 HKT

鍾嘉欣（Linda）昨晚舉行《Remember『記得』‧鍾嘉欣演唱會2024廣州站》，是她相隔10年再開個唱，全場座無虛席，好姊妹岑麗香、李亞男、苟芸慧、王君馨及好友黎諾懿與太太李潔瑩亦拉隊到廣州捧場。

為了今次個唱，Linda連月來努力練歌排舞，重拾巔峰狀態，演唱會上一共演繹21首歌，最令她感到挑戰的，是以勁歌熱舞跳唱《Love Love Love》、《得閒找你》及《夢伴》等作品，Linda說：「始終好多年冇跳舞，所以我跳出舒適圈好努力咁練習，好開心最後可以好順利完成，希望自己可以繼續做到老學到老，繼續挑戰新事物。」

提到演唱會最難忘一幕，Linda不諱言是唱《我結婚了》並向觀眾扔花球：「其實2015年突然結婚嘅消息，當時刺激咗好多錫我嘅人同粉絲，之後我再突然離開香港生活、生仔，好多粉絲都冇見證到我嘅婚禮，呢個環節好似之前結婚咁，分享番呢個重要時刻，而花球裏係好特別，有我寫嘅字句。其實成個演唱會，有好多令我感動嘅時刻，喺出騷前，我有個目的，就係上天透過我嘅正能量，將愛同關懷帶畀觀眾，好感動我喺今次演唱會成功做到！」

對於一班好姊妹專誠到廣州撐場，Linda大感驚喜：「唔知道佢哋會嚟，之前君馨又話要開會、亞男又話要返工，個個都好似好忙咁，佢哋突然間出現晒，好驚喜。」不過家人則因太長途而未有到場，Linda坦言有點可惜：「我同囡囡講『唔緊要，媽媽會繼續加油，下次睇我演唱會，演出會更加勁嘅』，而我老公，佢一定急不及待完騷後喺網上搵片嚟睇！」此外，Linda笑言完騷後要食餐勁，及想第一時間返加拿大見老公同仔女。

↓立即下載星島頭條App↓