關嘉敏簽TVB遭洗版2年鬧反骨匿埋喊 入行8年靠扮譚輝智登熱搜榜第一嚇親
發佈時間：07:00 2024-08-28
29歲的關嘉敏（Carman）在TVB綜藝節目《福祿壽訓練學院》中神還原《夢中人》的王菲；又女扮男裝變身《屈到病》「痰輝智」，扮嘢扮到上晒身登上「人氣熱搜」榜首，入行8年第一次。對於3年前，參加完ViuTV《全民造星3》後加盟TVB，被插「反骨無情」鬧足兩年，又撞正祖母離世，Carman當時有苦自己知，只能匿埋屋企喊。家陣貴為扮嘢新一代，已非二打六的Carman，自信滿滿咁話：「有能力嘅人去邊度都會發光！」採訪：方騫平 攝影：羅安強 場地：Amelia@海運大廈
關嘉敏在《福祿壽訓練學院終極對決》中，學足譚輝智(FC)唱歌時的扭曲表情和嘴形，再配合機械式舞步，䁽眼望以為係本人，最搞笑連FC仔女都以為係爸爸。原來Carman扮FC有段故：「我好佩服李思捷嘅眼光，我曾提出扮肥媽、周秀娜、朱咪咪等，有晚佢望住我張相3粒鐘就叫我試下扮佢(譚輝智)，而王菲都係佢叫我扮，我信佢。」
想譚輝智着裙扮阿妹
從未扮過嘢嘅Carman絞盡腦汁演出，逐格重溫FC唱《屈到病》及其訪問動態，她笑說：「感覺突然好熟悉呢個人，好有親切感，(做咗佢Fans？)我又唔夠拉姑撼呀，不過，如果可以合唱及一齊拍劇就好喇。」Carman仲有好多鬼主意，「既然FC都話我哋咁似，我哋可以演兄妹，由佢做哥哥或者戴假胸、着裙反串扮阿妹，咁樣好有喜劇效果，但佢始終係爸爸身份，唔知肯唔肯。」Carman曾是女子組合BINGO成員，出道8年只出過團歌未有Solo，故好恨有自己作品：「多年來Keep住有練歌，從來冇放棄過，唔想因為拍劇及做綜藝失去初心，期待乘勢爭取唱歌機會。」因為扮嘢扮出個未來，Carman覺得好驚喜：「入行咁耐，就算我點畀心機日日跳舞，甚至着泳衣都上唔到『人氣熱搜』榜首啦，更何況唔係『衰嘢』(負面嘢)，所以見到反應咁Hit都呆咗。」
由天堂跌落地獄好慘
2016年，Carman加入天盟娛樂成為女團隊長，收過只得8毫子嘅糧單。至2020年參加ViuTV《全民造星3》10強止步，人氣急升成功「脫貧」，可惜無以為繼。2021年加盟邵氏搵機會慘遭網民聲討，鬧足兩年「反骨妹」。時隔3年已放下，「唔諗好耐喇，唉！當年俾人鬧爆，有成千個批判留言，最唔開心責怪我反骨，演藝圈已經好少機會，佢哋當然唔會理解我感受，所以真係好無助好崩潰，最慘前幾個月仲好哋哋接job，人氣突然插水式下滑，接受唔到囉！咁啱同日祖母『走咗』，唔通仲同家人講我有幾唔開心咩？當時真係好辛苦，匿喺屋企喊足3日3夜，乜都冇做過。」
劇情需要可大膽演出
Carman慶幸好快企返起身，「去向由公司決定，除咗做好自己外，根本冇嘢做得到。」之後佢奉行「每次做嘢都唔好令自己後悔。」宗旨。另外因為被插足兩年，Carman已刀槍不入，更認為有能力嘅人去邊度都會發光！「要做有能力嘅人就要不停增值，我畀心機學話劇、功夫、打鼓、甚至射箭，想試多啲新嘢，會有多啲發揮。」已裝備好的Carman，期待做個全能藝人，拍劇、出歌、返內地做綜藝節目，甚至劇情需要，唔介意大膽演出。
