呂良偉內地拍戲被索女纏上靠絕招保平安 公開夫妻零嗌交秘訣勿被老婆睇唔起丨獨家
發佈時間：07:00 2024-08-30
67歲「不老男神」呂良偉坐擁數十億身家，近年努力研習氣功，不時在網上分享回春心得，造福人群。雖然結婚23年，但仍獲唔少內地進擊索女「約食飯」，睇得好透的呂哥唔會畀任何機會，火速落閘，又讚老婆越嚟越靚，仲話唔值得為「執一粒芝麻冇咗個西瓜。」另外，有情有義的呂哥罕談已故舊愛周海媚：「我哋有緣冇份，但有好多美麗回憶。」採訪：方騫平 攝影：朱偉彥 場地：The Market@Hotel ICON
1980年，呂良偉以劇集《上海灘》「丁力」一角一炮而紅；1991年的電影《跛豪》亦成為代表作。雖然在演藝界早已上神枱，他呂哥仍自我研發抗衰老的簡單養生課程，將30年來學習的武功結合氣功創作出獨門功夫，開班授課：「練精、氣、神主要係針對五臟六腑，內練一口氣外練筋骨皮，係內外兼收，而且由基礎開始，男女啱用。」阿呂爆老婆練咗4年，瘦咗又靚咗，變得精神飽滿；甚至有不育嘅女仕練完，生咗一子一女。
澄清唔係「百億駙馬」
呂哥經歷過3段婚姻，「後生唔成熟，都幾自我及大男人，𠵱家明白一個家庭會以愛行先，乜都老婆話事，佢開心咪得囉，咁家庭會幸福及和諧啲，我同小娟結咗婚23年冇乜嗌交，我有個『85/15』定律，一個家庭85%責任由男人承擔，由太太管理財政；事無大小聽佢意見。」對於被指「百億駙馬」，當年靠老婆大翻身，呂哥理直氣壯澄清：「啲人唔識我覺得係啫！佢(老婆)係多(錢)，但我都唔少呀！哈...我個心知，人哋點講係人哋嘅事，我冇辦法阻止人哋把口及思想，只能做好自己。」呂哥強調心態好強大，唔使老婆安慰：「因為我做緊乜，有冇使佢錢，佢同個仔係知㗎嘛！我個仔仲話『爹哋搵錢畀屋企；媽咪搵嘅錢係媽咪嘅。』男人個價值係乜呀？如果冇辦法為屋企創立到財富，個女人都睇你唔起啦，係咪？」他又乘機解釋，1997年曾被拖車係遭細佬拖累：「細佬用公司印章出車，我根本唔知情，連部車都未見過，及後已清晒尾數。」
執粒芝麻冇咗個西瓜
有錢又有面，呂哥直言在內地拍戲常遇誘惑：「呢啲事經常出現，自己知自己咩身分(人夫)，會守住本份，北上拍戲會帶埋兩個助手，遠離劇組住另一邊，收工就返房。」他認為畀機會人係自己嘅事，絕對唔係單向：「對方唔係傻，都會感受得到。」他自爆曾有索女約「食飯」，為打圓場裝作聽唔明，全面落閘：「話好多嘢做，唔得閒」呂哥認真說：「就算佢好索又如何呢？唔關我事喎，我唔係細路，會識得衡量家庭重要定去玩重要啲，值唔值得『執一粒芝麻冇咗個西瓜』，貪一時之快惹一身蟻咪好傻囉，更何況我老婆都好靚，而且越嚟越靚。娶個老婆係希望佢幾時都咁開心、幸福及有自信。」呂哥坦言曾有思想出軌時候，但保證唔會有行動，唔想老婆受傷害。
好想做導演拍另類嘢
呂哥罕談已故舊愛周海媚，指兩人有好多經歷及美好回憶。「當年我哋相處得好開心，我冇做過傷害對方嘅事，只係後生時性格自我唔肯相讓，變咗大家有緣冇份，及後見返面都有傾有講，我個心好錫佢，佢係一個幾乖幾純嘅女仔，亦係嗰段時間嘅最愛。」另外，呂哥堅持字典中冇退休二字：「咩叫唔使撈呀？就算有千億身家都要做，要有存在價值，有時間有能力就多做善事。(有咩仲想做？)我未做過導演，希望有機會拍另類題材，講下人性，而我只係演一個小角色，主力培育新人，香港有好多好演員，如《九龍城寨之圍城》『城寨四子』，見佢哋好搏，做演員一定要拼搏精神；仲有黃子華喺《毒舌大狀》表現都唔錯。」熱愛工作的呂哥暫時唔會拍劇；可有可無嘅電影角色都唔考慮。
