《中年2》鄭梓浩同居7年女友踢爆終極賤男長期偷食 揭軟飯王真身腳踏三船要食壯陽補品丨獨家
發佈時間：07:00 2024-09-05
憑《中年好聲音2》簽約TVB的鄭梓浩 (Brian，原名鄭家駒)原來是終極渣男，剛被分手的女友Grace挺身向《星島頭條》作出「愛的控訴」，表示跟55歲的Brian同居近7年，一直靠她供食供住，花足幾百萬助男友追歌星夢，但男方依然不斷偷食，除已婚「小三」外，還被一位出身演藝世家的半個圈中人「小四」包養，甚至呃女友送壯陽補品醫性功能障礙餵「小三」，連Brian大仔都睇唔過眼。傷透心的Grace決定大義滅親：「我覺得同一個咁嘅人一齊好恐怖！」採訪：曾盻堅
相關閱讀：《中年好聲音》曹敏寶緋聞男友被追數 遭「債主」公開欠債數目梁浩銓坦承：做錯咗
即睇鄭梓浩同居7年女友踢爆渣男真面目：
90年代出道的鄭梓浩曾移居紐西蘭，在當地結婚生子，婚姻破裂後於去年回流參加《中年好聲音2》，雖然11強止步，但挽回人氣，獲Fans讚似日本型男大叔，近期主持TVB《鄰住買》。Grace是Brian的初戀情人，兩人於2017年11月7日重遇，女方重提孽緣都好驚恐：「佢承諾會真心真意同我一齊，話『好後悔前半生媾女無數，玩到婚姻失敗，以後都唔會再做咁蠢嘅嘢。』我信以為真，2017年11月13日過咗50萬(45萬支票及5萬現金)畀佢找卡數及交租；咁佢話要返嚟香港做歌手追夢，我就幫佢打造韓星造型、影相、拍片及出Po，又請埋佢父母及兩子去旅行，佢兩個仔都叫我阿媽，就算未註冊，我哋都係一個family。」
鄭梓浩佛山收埋「小三」
Grace以為一家人生活好幸福，惡夢卻於去年12月底浮現。「同居6年，去年12月尾佢突然話借咗朋友元朗間屋住，會離開呢個家，之後會同紐西蘭回來嘅大仔返內地長住，幫大仔醫肌肉萎縮 (輕微) 病，當時已懷疑佢外出有女人，但佢唔認，強調冇放棄呢個家，但我堅持唔可以當屋企係酒店，唔畀佢返嚟。」至今年1月1日，Grace在相機內發現Brian跟一名女人的親密片段，「佢斷正先肯承認佛山有『小三』，原來佢每次返佛山做抖音直播，就call『小三』提供性服務，核核突突咁開完抖音就『搞嘢』，𠱁到『小三』畀咗兩萬蚊佢出車，就連大仔來回紐西蘭至香港機票，『小三』都資助咗一萬蚊。」Grace透露「小三」知道Brian有『老婆』，佢亦知道「小三」名字，「佢叫Shadow，37歲，同樣有老公及子女。」因為被發現偷食斷米路，Brian即求復合，日日在Grace屋企附近扮癡漢半個月，最終女方心軟原諒他。
鄭梓浩「小四」長租炮房
好戲在後頭，除了「小三」，原來Brian仲疊住有個猛料「小四」，除已婚及已為人母外更是半個圈中人，但多年來卻背住老公做「食家」：「Brian同『小四』搞咗幾個月曖昧大玩祼聊後，『小四』就多次主動約炮，去年12月中仲長租炮房畀Brian兩父子入住，承諾會畀更好嘅生活佢哋。」但Brian求饒時只認有『小三』，後來Grace接獲Brian大仔求救才真相大白，「大仔覺得好羞恥，佢見到爸爸今個禮拜上內地同『小三』瞓，下個禮拜返港同『小四』搞，所以希望『媽媽』救返爸爸返嚟！」最後亦因「小四」唔放水，Brian決定同「小四」劃清界線，「佢喺情人節晚返屋企，我又再原諒佢一次，但佢同『小四』有錢銀轇轕，「小四」甚至搵埋我追數，承受好大壓力。」到5月時，Brian趁Grace歐遊時又提出分手：「佢由內地返家擸晒啲名牌衫褲話要走，狠心留言『我已經唔再愛你，請你接受現實…』我仲求佢返嚟；一周後佢又話浪子回頭，對住阿仔及佢媽媽面前承諾會同我一生一世，以為係真，點知兩日後鬧完又走咗3周；7月初又話回頭，7月尾返內地開抖音直播跟住失聯。」Grace受盡折磨，「呢8個月佢不停拖拖拉拉住我，當個仔冇錢交租就叫我匯錢。上次返嚟仲懶得戚話『使乜理我咁多？男人最緊要識返屋企！』仲話頭3年只得我一個女人。」
鄭梓浩縱慾過度致性無能
問到Brian係咪性上癮？Grace覺得男方有偷食心理病：「佢個仔講咁多年都有，唔偷唔安樂，阿仔仲話去東京旅行，Brian喺隔籬床同『小四』搞嘢，其實可以book多間房，或者唔帶啲仔去啫。」Grace仲爆Brian用古惑招呃補品滾女，「Brian話中咗COVID影響到性無能，同我呻『之前媾女作孽太多，可能個天要懲罰佢』，甚至有性功能障礙，唔係想搞就搞到，叫我買啲中藥畀佢調理，我戇居居買咗啲鹿尾巴丸，佢收到後帶晒返內地食，話需時進補要日日食，後來先知原來係搞『小三』搞唔掂，叫我買嘢畀佢，呢條友黐線同變態，都唔好意思同人講，係返屋企前『食飽』咗，縱慾過度，導致性功能出障礙啫。佢真係大話連篇，7年感情我放唔低，所以我一直畀機會佢浪子回頭，但係原來佢周圍溝女嘅性格係唔會改，我今次死心嘞。」
其他文章：
中年好聲音2︱梁浩賢被爆今年結婚？劉威煌聽到有女聲叫老公 當事人口窒窒有呢個回應
《中年好聲音2》尹新杰婚紗相曝光 索妻李寶雯似韓劇主角 低胸長裙罕有性感
